રાજકોટ ખાતે ચંદ્રસિંહજી ભાડવા સ્ટડી સર્કલ દ્વારા સૌરાષ્ટ્ર અને કચ્છના ક્ષત્રિય સમાજના તેજસ્વી વિદ્યાર્થીઓને પ્રોત્સાહિત કરવા માટે 52મો વાર્ષિક વિદ્યા સત્કાર સમારંભ યોજાયો હતો. આ ગૌરવશાળી સમારોહમાં 500થી વધુ તેજસ્વી દીકરા-દીકરીઓને શૈક્ષણિક સિદ્ધિઓ બદલ એવોર્ડ એનાયત કરી સન્માનિત કરવામાં આવ્યા હતા. સમારોહમાં મુખ્ય અતિથિ તરીકે ઉપસ્થિત રહેલા ગુજરાતના રાજ્યકક્ષાના શિક્ષણમંત્રી રિવાબા જાડેજાએ વિદ્યાર્થીઓને માત્ર શિક્ષણ પૂરતું સીમિત ન રહેતાં રમતગમત તેમજ અન્ય ક્ષેત્રોમાં પણ શ્રેષ્ઠ પ્રદર્શન કરવા આહવાન કર્યું હતું. જોકે, સમારોહ પૂર્ણ થયા બાદ જામનગર અને દેવભૂમિ દ્વારકા જિલ્લામાં ઓછા વરસાદ અંગે પત્રકારોએ પ્રશ્ન પૂછતાં જ મંત્રી રિવાબાએ કોઈ જવાબ આપવાનું ટાળ્યું હતું.
સમારોહને સંબોધતા રાજ્યકક્ષાના શિક્ષણમંત્રી રિવાબા જાડેજાએ જણાવ્યું હતું કે, ચંદ્રસિંહજી ભાડવા સ્ટડી સર્કલ દ્વારા દર વર્ષની જેમ આ વર્ષે પણ તેજસ્વી વિદ્યાર્થીઓ અને વિદ્યાર્થિનીઓને સન્માનિત કરવા માટે સુંદર કાર્યક્રમનું આયોજન કરવામાં આવ્યું છે. છેલ્લા 50 વર્ષથી વધુ સમયથી આ સરાહનીય પ્રણાલી અવિરત ચાલી રહી છે, જેના થકી સમાજના તેજસ્વી યુવાનોને સન્માનિત કરી ઉત્તરોત્તર આગળ વધવા માટે મોટું પ્રોત્સાહન પૂરું પાડવામાં આવે છે.
રમતગમત અને ગવર્મેન્ટ સર્વિસમાં તેજસ્વી પ્રદર્શન કરનારાઓ પણ પુરસ્કૃત
મંત્રીએ આયોજન સાથે જોડાયેલા ચંદ્રસિંહજી ભાડવા સ્ટડી સર્કલના સમગ્ર ટ્રસ્ટીગણ, સમાજના શ્રેષ્ઠીઓ, આગેવાનો અને દાતાઓને હૃદયપૂર્વક અભિનંદન સહ શુભેચ્છાઓ પાઠવી હતી. તેમણે ઉમેર્યું હતું કે, “ફક્ત એજ્યુકેશનમાં જ નહીં, પરંતુ સ્પોર્ટ્સ, વિવિધ સર્વિસીસ કે સરકારી સેવાઓ જેવા અન્ય વિભાગોમાં પણ ઉત્કૃષ્ટ પ્રદર્શન કરનારા દીકરા-દીકરીઓને અભ્યાસની સાથે-સાથે આ રીતે પુરસ્કૃત કરીને બિરદાવવાની પહેલ ખરેખર પ્રશંસનીય છે.” આજે 500થી વધુ વિદ્યાર્થીઓને પ્રોત્સાહિત કરવા બદલ તેમણે તમામ વાલીગણ અને સમાજના અગ્રણીઓને ફરી એકવાર શુભેચ્છાઓ પાઠવી હતી.