ગોંડલ પંથકમાં લાંબા સમય બાદ મેઘરાજાનું આગમન થયું છે. વરસાદ વરસતા ખેડૂતોમાં ખુશીનો માહોલ જોવા મળી રહ્યો છે. છેલ્લા એકાદ મહિનાથી વરસાદ ખેંચાતા ખેડૂતો ચિંતિત હતા. પાક સુકાઈ રહ્યા હોવાથી તેમને નુકસાન થવાનો ડર હતો. છેલ્લા બે-ત્રણ દિવસથી અસહ્ય બફારા બાદ વાદળો ઘેરાયા હતા.
આ વર્ષે રાજ્યમાં ઓછો વરસાદ પડવાને કારણે ચોમાસુ પાક નિષ્ફળ જવાની ભીતિ હતી. જોકે, છેલ્લા બે-ત્રણ દિવસથી વરસાદી માહોલ જામ્યો છે અને તંત્ર દ્વારા સારા વરસાદની આગાહી કરવામાં આવી હતી. આજે ગોંડલ પંથકના ગામડાઓમાં વરસાદ આવતા ખેડૂતોમાં આનંદ છવાઈ ગયો છે.
એકાદ મહિનાથી વરસાદની રાહ જોવાઈ રહી હતી. ગઈકાલે આખો દિવસ બફારા અને વાદળછાયા વાતાવરણ બાદ રાતથી જ વરસાદ શરૂ થયો હતો. આ વરસાદથી સુકાઈ રહેલા પાકને નવજીવન મળ્યું છે.
લાંબા સમયથી વરસાદ ન હોવાથી મગફળી અને કપાસ જેવા ચોમાસુ પાકને પાણીની ખાસ જરૂર હતી. ગોંડલ પંથકમાં વરસાદ આવતા આ પાકોને નવજીવન મળવાની આશા વધી છે. કેટલાક વિસ્તારોમાં ઓછા વરસાદ અને પિયતની અછતને કારણે મગફળી અને કપાસનો પાક નિષ્ફળ ગયો હતો. હવે આ વરસાદથી ઉભા પાકને પણ ફાયદો થશે તેવી આશા ખેડૂતો રાખી રહ્યા છે.
ગઈકાલે રાતથી ઝરમર વરસાદ શરૂ થયો હતો. આજે સવારથી ગાજવીજ સાથે સારો વરસાદ પડી રહ્યો છે. ભાદરવા મહિનામાં જો આ રીતે વરસાદ ચાલુ રહેશે તો ઉભા પાકને વધુ ફાયદો થવાની શક્યતા છે.