વીંછીયા તાલુકાની ભડલી માધ્યમિક શાળા ખાતે કન્યા કેળવણી મહોત્સવ અને શાળા પ્રવેશોત્સવ અંતર્ગત એક ભવ્ય કાર્યક્રમનું આયોજન કરવામાં આવ્યું હતું. આ કાર્યક્રમમાં ભડલી સી.આર.સી. અંતર્ગત આવતી સાત શાળાઓના બાલવાટિકાના ભૂલકાઓ, તેમજ ધોરણ 1, ધોરણ 9 અને ધોરણ 11 માં નવો પ્રવેશ મેળવનાર વિદ્યાર્થીઓને ઉત્સાહભેર શાળા પ્રવેશોત્સવ કરાવવામાં આવ્યો હતો.
આ પ્રસંગે ભડલી ગામના અગ્રણી અને સામાજિક આગેવાન શ્રી જેઠાભાઇ ચાવડા તરફથી બાલવાટિકાના તમામ નાના-નાના બાળકોને પ્રોત્સાહન રૂપે દફતર અને પુસ્તકો ભેટ સ્વરૂપે આપવામાં આવ્યા હતા, જેથી બાળકોમાં ભારે આનંદનો માહોલ જોવા મળ્યો હતો.
આ પ્રવેશોત્સવ કાર્યક્રમમાં મુખ્ય મહેમાન તરીકે રાજકોટ આરોગ્ય વિભાગના નાયબ નિયામકશ્રી તેમજ વીંછીયાના તાલુકા વિકાસ અધિકારી ખાસ ઉપસ્થિત રહ્યા હતા અને તેઓએ વિદ્યાર્થીઓને ઉજ્જવળ ભવિષ્ય માટે પ્રેરણાદાયી માર્ગદર્શન પૂરું પાડ્યું હતું.
આ ઉપરાંત કાર્યક્રમમાં ભડલી સી.આર.સી. કો-ઓર્ડિનેટર દિલીપભાઈ ખંભાળિયા, જિલ્લા પંચાયત સભ્ય અમરશીભાઈ ચૌહાણ, વિનોદભાઈ વાલાણી તેમજ સામાજિક આગેવાન જેઠાભાઇ ચાવડા સહિતના મહાનુભાવો ઉપસ્થિત રહ્યા હતા.