બોઇંગ અને લોકહીડ માર્ટિનની સંયુક્ત કંપની યુનાઇટેડ લોન્ચ એલાયન્સ (ULA)નું વલ્કન રોકેટ રવિવારે ફ્લોરિડાથી લોન્ચ થયા બાદ માત્ર 10 મિનિટમાં જ નિષ્ફળ થઈ ગયું.
આ રોકેટમાં એમેઝોનના ‘LEO’ બ્રોડબેન્ડ ઇન્ટરનેટ યુનિટ માટે 40 સેટેલાઇટ લઈ જવામાં આવી રહ્યા હતા. તે પણ નષ્ટ થઈ ગયા. ULAના 20 વર્ષના ઇતિહાસમાં આ પ્રથમ સંપૂર્ણ મિશન નિષ્ફળતા છે.
વલ્કનની 5મી ઉડાન હતી
આ વલ્કન રોકેટની માત્ર 5મી ઉડાન હતી અને 9 મહિના બાદની પ્રથમ ઉડાન હતી. આ પહેલાં સોલિડ બૂસ્ટરના નોઝલમાં સમસ્યાને કારણે બે ઉડાનોમાં મુશ્કેલી આવી હતી, જેને ઠીક કરવામાં સમય લાગ્યો.
રવિવારની ઉડાન પહેલાં પણ કાઉન્ટડાઉનમાં બે વખત વિક્ષેપ આવ્યો હતો—એક વખત નેટવર્કને કારણે અને બીજી વખત ગ્રાઉન્ડ સિસ્ટમના નાઇટ્રોજન પ્લાન્ટમાં આવેલી ખામીને કારણે. જોકે, હાલમાં તેને નિષ્ફળતા સાથે જોડવામાં આવ્યું નથી.
એમેઝોનને મોટો ફટકો
અમેરિકન નિયમનકારી સંસ્થા FCCના નિયમો હેઠળ એમેઝોને જુલાઈ 2029 સુધીમાં 3,232 ઉપગ્રહોને ઓર્બિટમાં પહોંચાડવાના છે. અત્યાર સુધી એમેઝોને માત્ર 396 ઉપગ્રહો લોન્ચ કર્યા છે. રવિવારનું મિશન સફળ થયું હોત તો આ સંખ્યા 436 થઈ જાત અને વલ્કન પર 38 લોન્ચવાળી ડીલની શરૂઆત થાત.
એમેઝોને કહ્યું છે કે તે 2026ના અંત સુધીમાં અમેરિકા અને બ્રિટનમાં Leoની પ્રારંભિક સેવા શરૂ કરવા માંગે છે. હવે આ સમયપત્રક તપાસના પરિણામ પર નિર્ભર રહેશે.