ઈટાલીના નેતા જિયાકોમો ફિલિબેકે શનિવારે હૈદરાબાદમાં યોજાયેલી ભારત સમિટમાં કોંગ્રેસનું ‘વોટ ચોર, ગદ્દી છોડ’નો નારો લગાવ્યો.
આનો એક વીડિયો સોશિયલ મીડિયા પર વાયરલ થઈ રહ્યો છે. તેમાં રાહુલ ગાંધી તાળીઓ પાડતા જોવા મળી રહ્યા છે. આ અંગે કેન્દ્રીય મંત્રી કિરણ રિજિજુએ નામ લીધા વિના રાહુલ ગાંધી પર કટાક્ષ કર્યો. તેમણે સવાલ કર્યો કે જ્યારે કોઈ વિદેશી ભારતનું અપમાન કરે છે, ત્યારે કોણ હસે છે?
ફિલિબેક યુરોપિયન સોશ્યાલિસ્ટ પાર્ટી (PES)ના મહાસચિવ છે. તેમણે પોતાના ભાષણમાં રાહુલ ગાંધીની પ્રશંસા કરી અને મતદાર યાદીમાં ગેરરીતિ વિરુદ્ધના તેમના અભિયાનને સમર્થન આપ્યું. તેમણે કહ્યું કે રાહુલ ગાંધીએ ‘એક વ્યક્તિ, એક મત’ના અધિકારનું રક્ષણ કર્યું છે.
ભાજપના રાષ્ટ્રીય પ્રવક્તા સુધાંશુ ત્રિવેદીએ કહ્યું- આખરે કોંગ્રેસ એવા લોકોને પોતાના રાજકીય મંચ પર શા માટે સ્થાન આપી રહી છે, જેમના તાર જ્યોર્જ સોરોસ સમર્થિત ‘ઓપન સોસાયટી’ નેટવર્ક અને એમ્નેસ્ટી ઇન્ટરનેશનલ સાથે જોડાયેલા છે.
ઇક્વાડોરના ભૂતપૂર્વ મંત્રી ગુઇલેર્મો લૉંગ અને એમ્નેસ્ટીના ભૂતપૂર્વ મહાસચિવ સલિલ શેટ્ટી જેવા વિવાદાસ્પદ વ્યક્તિઓનાં નામ સામે આવ્યાં, જેમના પર ભૂતકાળમાં કાશ્મીર અને ભારતની લોકતાંત્રિક સંસ્થાઓ વિરુદ્ધ નિવેદનો આપવાના ગંભીર આરોપો છે.
સીઆર કેસવને વિદેશી પ્રતિનિધિઓની પૃષ્ઠભૂમિ પર સવાલો ઉઠાવ્યા
સીઆર કેસવને રવિવારે સોશિયલ મીડિયા પ્લેટફોર્મ એક્સ પર પોસ્ટ કરીને કહ્યું કે કોંગ્રેસ દ્વારા આયોજિત ભારત સમિટમાં રાહુલ ગાંધી અને તેમના સહયોગીઓએ દેશ અને લોકશાહી વિરુદ્ધ અપમાનજનક વાતો કહી. તેમણે આરોપ મૂક્યો કે કાર્યક્રમમાં સામેલ કેટલાક વિદેશી પ્રતિનિધિઓની વિશ્વસનીયતા શંકાસ્પદ છે.