ફૂડ ડિલિવરી કરતી કંપની ઇટરનલ એટલે કે ઝોમેટોએ નાણાકીય વર્ષ 2025-26ના ચોથા ક્વાર્ટરમાં 17,634 કરોડ રૂપિયાની કુલ કમાણી કરી. આ ગયા વર્ષની સરખામણીમાં 184% વધી છે. ગયા વર્ષના સમાન ક્વાર્ટરમાં કંપનીએ 6,201 કરોડ રૂપિયાની કમાણી કરી હતી.
કુલ કમાણીમાંથી પગાર, ટેક્સ, કાચા માલની કિંમત જેવા ખર્ચાઓ બાદ કરતાં કંપની પાસે 174 કરોડ રૂપિયાનો ચોખ્ખો નફો (નેટ પ્રોફિટ) બચ્યો. આ 2025ના જાન્યુઆરી-માર્ચ ક્વાર્ટર કરતાં 346% વધુ રહ્યો છે. ગયા વર્ષે કંપનીને 39 કરોડ રૂપિયાનો નફો થયો હતો.
રેવન્યુ 196% વધીને ₹17,292 કરોડ રહી
ચોથા ક્વાર્ટરમાં કંપનીની રેવન્યુ 17,292 કરોડ રૂપિયા રહી. વાર્ષિક ધોરણે આ 196% વધી છે. જાન્યુઆરી-માર્ચ 2025માં કંપનીએ 5,833 કરોડ રૂપિયાનું રેવન્યુ જનરેટ કરી હતી. વસ્તુઓ અને સેવાઓના વેચાણમાંથી મળતી રકમને રેવન્યુ કહેવાય છે.
ચોથા ક્વાર્ટરના પરિણામો પછી, ઝોમેટોનો શેર આજે 1.09% વધીને 258.28 રૂપિયા પર બંધ થયો. છેલ્લા 6 મહિનામાં કંપનીનો શેર 22% ઘટ્યો છે.
જ્યારે, આ વર્ષે એટલે કે 1 જાન્યુઆરીથી અત્યાર સુધી કંપનીનો શેર 9% ઘટ્યો છે. જ્યારે, છેલ્લા એક વર્ષમાં કંપનીનો શેર 14% વધ્યો છે. ઝોમેટોનું માર્કેટ કેપ 2.30 લાખ કરોડ રૂપિયા છે.
કન્સોલિડેટેડ નફો એટલે આખા ગ્રુપનું પ્રદર્શન
કંપનીઓના પરિણામો બે ભાગમાં આવે છે – સ્ટેન્ડઅલોન અને કન્સોલિડેટેડ. સ્ટેન્ડઅલોનમાં ફક્ત એક યુનિટનું નાણાકીય પ્રદર્શન દર્શાવવામાં આવે છે, જ્યારે કન્સોલિડેટેડ અથવા એકીકૃત નાણાકીય રિપોર્ટમાં આખી કંપનીનો રિપોર્ટ આપવામાં આવે છે.
અહીં, ઝોમેટોની બ્લિન્કિટ સહિત 21 સબસિડિયરી અને 1 ટ્રસ્ટ છે. આ બધાના ફાઇનાન્સિયલ રિપોર્ટને ભેગા કરીને કન્સોલિડેટેડ કહેવાશે. જ્યારે, બ્લિન્કિટના અલગ રિઝલ્ટને સ્ટેન્ડઅલોન કહેવાશે.