શાપર–વેરાવળમાં શીતળા મંદિર સામેના નદીકિનારે અને પી.એસ. પ્લાયવુડ પાછળના નદીઘાટે છઠ પૂજાનું આયોજન થયું હતું. સ્થાનિક ઔદ્યોગિક વિસ્તારમાં કામ કરતા પરપ્રાંતીય શ્રમિકો પૂજા માટે એકત્ર થયા હતા.
શ્રમિકોએ પરંપરાગત વિધિથી પૂજા-અર્ચના કરી હતી. આ દરમિયાન ભક્તિગીતો ગાવામાં આવ્યાં અને ફટાકડા ફોડીને પર્વની ઉજવણી કરવામાં આવી હતી.
છઠ પર્વ સૂર્યદેવ અને છઠ્ઠી મૈયાની ઉપાસનાને સમર્પિત છે. આ પર્વમાં સાંજે આથમતા અને સવારે ઊગતા સૂર્યને અર્ઘ્ય આપવાની પરંપરા છે. વ્રતધારીઓ જળમાં ઊભા રહીને સૂર્યદેવની ઉપાસના કરે છે. તેથી નદી કે તળાવના કિનારે પૂજા કરવામાં આવે છે.
છઠ પર્વમાં વ્રત રાખવાની અને પૂજા વખતે ફળ તથા પ્રસાદ ધરાવવાની પરંપરા છે. વ્રતધારીઓ પરિવારના સુખ, સમૃદ્ધિ અને સ્વાસ્થ્ય માટે પ્રાર્થના કરે છે. બિહાર, ઝારખંડ અને પૂર્વી ઉત્તર પ્રદેશમાં આ પર્વનું વિશેષ મહત્ત્વ છે. રોજગાર માટે અન્ય વિસ્તારોમાં રહેતા લોકો પણ આ પરંપરા જાળવે છે.