પશ્ચિમ બંગાળ વિધાનસભા સચિવાલયે મંગળવારે તૃણમૂલ કોંગ્રેસ (ટીએમસી)ના બળવાખોર જૂથ સાથે સંકળાયેલા 10 ધારાસભ્યોને નોટિસ મોકલી. તેમને એક અઠવાડિયાની અંદર જવાબ આપવા જણાવાયું છે.
આ નોટિસ મમતા બેનર્જીના નેતૃત્વ હેઠળના જૂથ દ્વારા દાખલ કરવામાં આવેલી ગેરલાયકાત અરજી પર મોકલવામાં આવી છે. આ અરજી પછી, પાર્ટીમાં ચાલી રહેલો સત્તા સંઘર્ષ હવે ઔપચારિક કાર્યવાહીમાં ફેરવાઈ ગયો છે.
આ ધારાસભ્યોને નોટિસ મોકલવામાં આવી
નોટિસ વિપક્ષના નેતા ઋતબ્રત બેનર્જી અને અન્ય નવ ધારાસભ્યોને મોકલવામાં આવી છે. તેમાં અરુપ રોય, ફિરહાદ હકીમ, સંદીપન સાહા, અખરુજ્જમાન અંસારી, શિયુલી સાહા, સબીના યાસ્મીન, વિપ્લવ મિત્રા, જાવેદ ખાન અને રતિન ઘોષનો સમાવેશ થાય છે.
મંગળવારે મોડી રાત્રે આ મામલો સામે આવ્યો. બળવાખોર ધારાસભ્ય અખરુજ્જમાન અંસારીએ નોટિસ મળ્યાની પુષ્ટિ કરી. તેમણે કહ્યું- અમે પાર્ટીની અંદર આ મામલે ચર્ચા કરીશું. ત્યારબાદ સમયસર જવાબ આપીશું.
એક દિવસ પહેલા જ સુપ્રીમ કોર્ટમાં પહોંચ્યો છે મામલો
આ ઘટનાક્રમ વરિષ્ઠ TMC ધારાસભ્ય શોભનદેબ ચટ્ટોપાધ્યાય દ્વારા સુપ્રીમ કોર્ટમાં દાખલ કરાયેલી અરજીના એક દિવસ પછી સામે આવ્યો છે. ચટ્ટોપાધ્યાય મમતા બેનર્જીના નેતૃત્વવાળા જૂથ વતી વિધાનસભામાં વિરોધ પક્ષના નેતા પદના ઉમેદવાર છે.
તેમણે ઋતબ્રત બેનર્જી અને અન્ય નવ ધારાસભ્યોને પક્ષપલટા વિરોધી કાયદા હેઠળ ગેરલાયક ઠેરવવાની માંગ કરી છે. ચટ્ટોપાધ્યાયે 7 જુલાઈએ વિધાનસભા અધ્યક્ષ રથિન બોઝને પત્ર લખીને 10 ધારાસભ્યોને ગેરલાયક ઠેરવવાની માંગ કરી હતી.
વિપક્ષના નેતાની નિમણૂકનો મામલો પહેલાથી જ કલકત્તા હાઈકોર્ટમાં પેન્ડિંગ છે. ચટ્ટોપાધ્યાયે વિધાનસભા અધ્યક્ષના રિતબ્રત બેનર્જીને આ પદ પર માન્યતા આપવાના નિર્ણયને પડકાર્યો છે.