વર્ષ 2000ની આસપાસની વાત છે. આશરે 18 વર્ષની કેટરીના કૈફને અનુરાગ બાસુના ડિરેક્શનમાં બની રહેલી ફિલ્મ ‘સાયા’ મળી, જેમાં જોન અબ્રાહમ લીડ રોલમાં હતો. લીડ એક્ટ્રેસ તરીકે બોલિવૂડમાં આ તેની પહેલી ફિલ્મ હોત. એક રાત્રે તેને શૂટિંગ પર બોલાવવામાં આવી. ન તો કોઈ ડાયલોગ હતો, ન કોઈ એક્સપ્રેશન, બસ ડમી પાસિંગ શોટ આપવાનો હતો. બીજા દિવસે તેને ફરી બોલાવવામાં આવી, એક સીન શૂટ થયો અને તરત જ પેકઅપ થઈ ગયું. થોડીવાર પછી ત્યાં હાજર પ્રોડ્યુસર મહેશ ભટ્ટે કહ્યું કે, ‘આ છોકરીને ફિલ્મમાંથી કાઢી મૂકો.’ ટીમે જ્યારે આ વાત તેને જણાવી, ત્યારે તે રડી પડી. તે ધ્રુસકે-ધ્રુસકે રડતાં-રડતાં સેટ પરથી બહાર નીકળી અને વિચાર્યું કે, ‘મારું કરિયર અહીં જ પૂરું થઈ ગયું, હું ક્યારેય એક્ટિંગ નહીં કરી શકું.’
કેટરીના માટે આ રિજેક્શન સહન કરવું મુશ્કેલ હતું. હોંગકોંગમાં જન્મેલી કેટરીનાએ માત્ર 14 વર્ષની ઉંમરે મોડેલિંગ શરૂ કર્યું હતું. એક એશિયન મિત્રના કહેવા પર તે ભારત ફરવા આવી હતી, જ્યાં તેને બી-ગ્રેડ ફિલ્મ ‘બૂમ’ (2003)માં કામ મળી ગયું. આ ફિલ્મ પછી તેને ઘણી ઓફરો મળી હતી, જેના આધારે તેણે બોલિવૂડ એક્ટ્રેસ બનવાનું સપનું જોયું હતું.
સાંજે જ્યારે સલમાન મળ્યો, તો કેટરીના તેની સામે પણ રડી પડી. આ જોઈને સલમાન હસવા લાગ્યો.
કેટરીના ચીઢાઈને બોલી- ‘મને મારી પહેલી ફિલ્મમાંથી કાઢી મૂકવામાં આવી છે, મારી જિંદગી બરબાદ થઈ ગઈ છે અને તું હસી રહ્યો છે.’
સલમાને જોરથી હસતાં હસતાં કહ્યું- ‘આનાથી કંઈ નહીં થાય, હું જાણું છું કે તું બહુ આગળ જવાની છે. આ બધું થશે, મારી પાસે અત્યારે કોઈ જવાબ નથી, પણ તું પોતે જોઈશ કે તું કેટલી આગળ વધીશ.’
તે દિવસે સલમાને કહેલી વાત ખરેખર સાચી સાબિત થઈ. જે ફિલ્મ ‘સાયા’ માંથી કેટરીનાને કાઢી મૂકવામાં આવી હતી, તે ફ્લોપ થઈ ગઈ અને વર્ષ 2005માં કેટરીનાની એક નહીં પણ બે મોટી ફિલ્મો રિલીઝ થઈ. પહેલી ફિલ્મ અમિતાભ બચ્ચન અને અભિષેક બચ્ચન સાથેની ‘સરકાર રાજ’ હતી અને બીજી બોલિવૂડના સુપરસ્ટાર સલમાન ખાન સાથેની ‘મૈંને પ્યાર ક્યૂં કિયા’. આ ફિલ્મમાં પોતાની સુંદરતા અને ચાર્મથી કેટરીના દેશભરમાં પોપ્યુલર થઈ ગઈ. તેના ગીતો બ્લોકબસ્ટર હિટ રહ્યા અને ટૂંક સમયમાં જ તેનું નામ બોલિવૂડની ટોપ એક્ટ્રેસિસમાં સામેલ થઈ ગયું. સંયોગ એવો પણ રહ્યો કે, જે અનુરાગ બાસુની ફિલ્મમાંથી તેમને કાઢી મૂકવામાં આવી હતી, તે જ અનુરાગે જ્યારે ‘બર્ફી’ જેવી મોટી ફિલ્મ બનાવવાનું શરૂ કર્યું, ત્યારે સૌથી પહેલા તેમના મનમાં કેટરીનાનો જ વિચાર આવ્યો હતો.