ભારતીય ડાયલોગ રાઈટર અને ગીતકાર જાવેદ અખ્તર પાકિસ્તાનના રાષ્ટ્રપતિ આસિફ અલી ઝરદારીના તે નિવેદન પર ભડકી ઉઠ્યા હતા, જેમાં તેમણે કહ્યું હતું કે તેઓ પાકિસ્તાનમાં હિંદુઓને સહન કરે છે. જાવેદ અખ્તરે તેમની ટીકા કરતા તેમને સંવેદનહીન કહ્યા છે. જ્યારે કેટલાક લોકો જાવેદ અખ્તરના નિવેદનની નિંદા કરવા લાગ્યા, ત્યારે તેમણે એક પછી એક બધાને ઠપકો આપ્યો.
ઝરદારી બોલ્યા- અમે હિંદુઓને સહન કરીએ છીએ
ઝરદારીએ પાકિસ્તાનમાં હિંદુઓની સ્થિતિ વિશે વાત કરતા ભારતના હિંદુઓ સાથે તેમની સરખામણી કરી હતી. ઝરદારીએ કહ્યું, “ભારતીયોનો દૃષ્ટિકોણ અલગ છે. તેમના મગજમાં તેમનો પોતાનો એજન્ડા છે. તેઓ અખંડ ભારતમાં વિશ્વાસ કરે છે. પરંતુ વચ્ચે ઘણું બધું એવું છે, જેને તેઓ ભૂલી ગયા છે.”
તેમણે આગળ કહ્યું, “અમે મુસલમાન છીએ અને તેઓ નથી. પરંતુ અમે એવી વિચારસરણીવાળા મુસલમાન છીએ, જે પાકિસ્તાનમાં 3-4 ટકા હિંદુ વસ્તીને સહન કરીએ છીએ. તેઓ એટલા જ આઝાદ અને સારા છે, જેટલા ક્યાંય પણ હતા. તેઓ તેમની સાથે રહેવાને બદલે અમારી સાથે રહેવાનું પસંદ કરશે.”
આ નિવેદન પર જાવેદ અખ્તરે ઓફિશિયલ સોશિયલ મીડિયા પર લખ્યું છે, “પાકિસ્તાનના મિસ્ટર ઝરદારી, જે બેનઝીર ભુટ્ટો સાથે લગ્ન કર્યા પછી ચર્ચામાં આવ્યા હતા, કહે છે કે તેમના દેશમાં 3-4 ટકા હિંદુ વસ્તીને તેઓ સહન કરે છે. હું સમજું છું, મિસ્ટર ઝરદારી, તમે હંમેશા તે બધી બાબતો પ્રત્યે અસંવેદનશીલ રહ્યા છો, જેમની ટકાવારી 10 ટકાથી પણ ઓછી છે.”