ઉ૫લેટા તાલુકા અને આજુબાજુ વિસ્તારોમાં રવિવારે રાતે ધોધમાર વરસાદ વરસતાં તાલુકાના લાઠ અને ભીમોરા ગામે જવાના રસ્તા પર બેઠા પુલ પર પૂરના પાણી ફરી વળ્યા હતા. આથી આ ગામો તાલુકા મથકથી સંપર્ક વિહોણા બન્યા હતા. જેના પગલે કોલેજના 9 પરીક્ષાર્થી ભીમોરામાં ફસાતાં તાલુકા વહીવટી તંત્રના આદેશથી SDRFની ટીમ ત્યાં પહોંચી હતી અને સલામત રીતે ભારે વાહનમાં પુલ પાર કરાવીને પરીક્ષા કેન્દ્ર પર પહોંચાડ્યા હતા. જોકે, બાદમાં પરીક્ષા ન આપી શકતા વિદ્યાર્થીઓની 15 દિવસ બાદ પૂરક પરીક્ષા લેવડાવવામાં આવશે.
ગતરાતે ઉપલેટા તાલુકામાં ભારે વરસાદથી લાઠ અને ભીમોરા ગામનો સંપર્ક, વાહન-વ્યવહાર પૂરના પાણીથી કપાયો હતો. આજે (1 જુલાઈ) સવારે આ અંગેની જાણ થતાં જ તાલુકા વહીવટી તંત્રે સ્થાનિક આગેવાનો સાથે ટેલિફોનીક સંપર્ક કર્યો અને ગામની સ્થિતિ જાણી હતી. જેમાં લાઠ-ભીમોરા ગામમાં વરસાદી પાણીથી રસ્તો બંધ થતાં ગામેથી તાલુકા મથકે કોલેજમાં પરીક્ષા માટે જવા માગતા કોલેજીયન છાત્રો અટવાયા હોવાની માહિતી સામે આવી હતી.