કર્મચારીઓના મોનિટરિંગને લઈને દેશની સૌથી મોટી IT કંપની ટાટા કન્સલ્ટન્સી સર્વિસિસ (TCS) વિવાદોમાં આવી ગઈ છે. રિપોર્ટ અનુસાર, કંપની તેના કર્મચારીઓના લેપટોપ અને વર્કસ્ટેશન પર મોનિટરિંગ ટૂલ્સનો ઉપયોગ કરી રહી છે.
જોકે, TCSનું કહેવું છે કે આ ટૂલ્સનો હેતુ કોઈ કર્મચારીની વ્યક્તિગત ગતિવિધિઓ પર નજર રાખવાનો નથી, પરંતુ સમગ્ર નેટવર્કની ઓવરઓલ પરફોર્મન્સ અને સિસ્ટમ સિક્યોરિટીને સુધારવાનો છે.
વિવાદનું મુખ્ય કારણ: વ્યક્તિગત પ્રવૃત્તિઓનું ટ્રેકિંગ
વિવાદ ત્યારે શરૂ થાય છે જ્યારે આ ટૂલ્સ સિસ્ટમ-લેવલની માહિતીથી આગળ વધીને કોઈ કર્મચારીના અંગત કામ અને પ્રવૃત્તિઓનો વિગતવાર રેકોર્ડ રાખવાનું શરૂ કરે છે.
મની કંટ્રોલના એક રિપોર્ટમાં દાવો કર્યો હતો કે TCSના ટૂલ્સને એપ્લિકેશન-લેવલ સુધીની વિઝિબિલિટી પ્રાપ્ત છે.
જ્યારે બીજી તરફ TCSએ તેના સત્તાવાર નિવેદનમાં સ્પષ્ટ કર્યું છે કે તેમની દેખરેખ માત્ર મેક્રો-લેવલ પર નેટવર્ક પર્ફોર્મન્સ સુધી જ મર્યાદિત છે અને તેઓ વ્યક્તિગત કર્મચારીની પ્રવૃત્તિઓને ટ્રેક કરતા નથી.
કાર્યસ્થળ પર કર્મચારીઓની દેખરેખ એટલે કે વર્કપ્લેસ મોનિટરિંગનો આ મુદ્દો ફક્ત TCS પૂરતો મર્યાદિત નથી. ગ્લોબલ ટેક ઇન્ડસ્ટ્રીમાં પહેલા પણ આવા કિસ્સાઓ સામે આવી ચૂક્યા છે. દિગ્ગજ ટેક કંપની મેટાને પણ તેના એક AI-સંબંધિત પ્રોજેક્ટ દરમિયાન ટીકાનો સામનો કરવો પડ્યો હતો.
મેટાએ એક એવી સિસ્ટમ રજૂ કરી હતી જે કર્મચારીઓના કી-સ્ટ્રોક્સ અને માઉસ એક્ટિવિટીનો ડેટા એકત્રિત કરી શકતી હતી. બાદમાં ભારે વિરોધને કારણે મેટાને કર્મચારીઓ માટે ડેટા કલેક્શન રોકવા અને છૂટ માંગવાનો વિકલ્પ આપવો પડ્યો હતો.