રાજકોટ જિલ્લા પંચાયતની ખાસ કારોબારી સમિતિની બેઠક આજરોજ મળી હતી, જેમાં કુલ 29 કામોની રૂ. 51.85 કરોડના ટેન્ડર તથા વહીવટી વિકાસના કામોને મંજૂરી આપવામાં આવી હતી. જિલ્લા પંચાયત કચેરી ખાતે કારોબારી ચેરમેન પી. જી. ક્યાડાના અધ્યક્ષસ્થાને મળેલી બેઠકમાં બાંધકામના કુલ 5 મોટા કામો માટે રૂ. 39,05,10,504નાં ટેન્ડરને મંજૂર કરવામાં આવ્યું હતું તો સિંચાઈના 11 કામો માટે કુલ રૂ. 7,68,96,851નાં ટેન્ડરને મંજૂરી આપવામાં આવી હતી. ઉપરાંત અન્ય 5 કામોની વહીવટી મંજૂરી માટે રૂ. 5,05,88,000 ફાળવી દેવામાં આવ્યા હતા.
કારોબારી ચેરમેન પી.જી. ક્યાડાનાં જણાવ્યા મુજબ આજે મળેલી બેઠકમાં અંદાજીત રૂ. 52 કરોડના વિકાસ કામો મંજૂર કરવામાં આવ્યા છે. જેમાં જસદણ તેમજ તેની આસપાસના ડેમોનું 20 વર્ષથી રીનોવેશન થયું નહીં હોવાથી તેને પ્રાથમિકતા આપી છે. મંત્રી બાવાળીયાની મંજૂરી મળી ગઈ હોવાથી તાત્કાલિક આ કામો કરવામાં આવનાર છે. આગામી એક વર્ષમાં રાજકોટ જિલ્લાના તમામ જૂના ડેમોનું જરૂરી સમારકામ કરવાની ખાતરી પણ તેમણે આપી હતી.