યુક્રેનના મધ્યમાં આવેલા નિપ્રો શહેરમાં ગુરુવારે સવારે રશિયન ડ્રોને રેલવે સ્ટેશન પર હુમલો કર્યો. અધિકારીઓના જણાવ્યા અનુસાર, હુમલામાં 14 લોકોનાં મોત થયાં છે, જ્યારે અન્ય 10 લોકો ઘાયલ થયા છે.
શહેરના મેયર બોરિસ ફિલાતોવે જણાવ્યું કે ડ્રોને મુસાફરોને લઈ જતી ઇલેક્ટ્રિક ટ્રેનને નિશાન બનાવી હતી.
યુક્રેનના રાષ્ટ્રપતિ વોલોદિમીર ઝેલેન્સ્કીએ હુમલાને ભયાનક ગણાવ્યો. તેમણે આવા હુમલાઓને રોકવા માટે રશિયા પર વધુ કડક પ્રતિબંધો લાદવાની માંગ કરી.
યુક્રેનની સરકારી રેલવે કંપની અનુસાર, ડ્રોને તે પ્લેટફોર્મને નિશાન બનાવ્યું હતું, જ્યાં નિપ્રોથી ઝાપોરિઝિયા જતી ટ્રેન નંબર 866 ઊભી હતી.
ટ્રેન રવાના થવાની તૈયારીમાં હતી. રેલવે કંપનીએ જણાવ્યું કે જોખમ અંગે ચેતવણી જારી કરવામાં આવી હતી, પરંતુ તેમ છતાં પ્લેટફોર્મ પર મોટી સંખ્યામાં લોકો હાજર હતા.