જસદણ તાલુકાના ભંડારીયા ગામમાં અંદાજે રૂ.25 લાખના ખર્ચે બનાવેલો પીવાના પાણીનો ટાંકો 3 વર્ષથી બિનઉપયોગી હોવાનો મુદ્દો સામે આવ્યો છે.
ગામલોકોને નિયમિત પાણી પૂરું પાડવાના હેતુથી બનાવવામાં આવેલા આ ટાંકામાંથી આજદિન સુધી પાણી વિતરણ થઈ શક્યું નથી.
ટાંકામાં પાણી ભરતાં લીકેજ થતું હોવાના કારણે તે ઉપયોગમાં લઈ શકાતો નથી. બીજી તરફ, ગામમાં હાલ કૂવામાં મોટર ઉતારી પાઇપલાઇન મારફતે માંડ 10 દિવસે એક વાર પાણી વિતરણ કરાતું હોવાનું ગ્રામજનો જણાવી રહ્યા છે.
હલકી ગુણવત્તાના મટીરિયલના ઉપયોગનો આક્ષેપ
સ્થાનિક ગ્રામજનોના આક્ષેપ મુજબ, ટાંકાના બાંધકામમાં રેતી, કપચી અને લોખંડ સહિતનું હલકી ગુણવત્તાનું મટીરિયલ વાપરવામાં આવ્યું હતું. તેના કારણે ટાંકામાં પાણી ભરતાં લીકેજ થતું હોવાનું તેઓ જણાવી રહ્યા છે. કોન્ટ્રાક્ટરે 2થી 3 વખત કેમિકલ લગાવી લીકેજ બંધ કરવાનો પ્રયાસ કર્યો હોવા છતાં પાણી ટકતું ન હોવાનું ગ્રામજનોનું કહેવું છે. જોકે, બાંધકામની ગુણવત્તા અંગેના આક્ષેપોની ટેકનિકલ તપાસ થવી જરૂરી છે.
ગ્રામપંચાયત હસ્તકના કૂવામાંથી 10 દિવસે માંડ એક વાર પાણી વિતરણ
ટાંકો ઉપયોગમાં ન લેવાતો હોવાથી ભંડારીયા ગામમાં પાણી વિતરણ માટે ગ્રામ પંચાયત હસ્તકના કૂવામાં મોટર ઉતારી પાઇપલાઇન દ્વારા પાણી પહોંચાડવામાં આવે છે. ગ્રામજનોના જણાવ્યા મુજબ, આ વ્યવસ્થા હેઠળ માંડ 10 દિવસે એક વાર પાણી મળે છે. પરિણામે ગ્રામજનોને પીવાના પાણી માટે મુશ્કેલીનો સામનો કરવો પડે છે.