રાજકોટમાં આવાસ મેળવ્યા બાદ નિયમિત હપ્તા નહીં ભરવાનું લાભાર્થીઓને ભારે પડ્યું છે. રાજકોટ શહેરી વિકાસ સત્તામંડળ (રૂડા) દ્વારા પ્રધાનમંત્રી આવાસ યોજના અંતર્ગત મહત્વનો અને કડક નિર્ણય લેવામાં આવ્યો છે. આ અંતર્ગત જે લાભાર્થીઓ દ્વારા લાંબા સમયથી હપ્તાની રકમ જમા કરાવવામાં આવી ન હતી, તેવા ચાર આવાસધારકોના મકાનો તાત્કાલિક અસરથી રદ કરી દેવામાં આવ્યા છે. રૂડાની બેઠકમાં થયેલા ઠરાવ અનુસાર આ કાર્યવાહી કરાઈ છે. જોકે, લાભાર્થીઓને રજુઆત માટે 7 દિવસનો સમય અપાયો છે.
રાજકોટ શહેરી વિકાસ સત્તામંડળ દ્વારા નિર્મિત પ્રધાનમંત્રી આવાસ યોજના અંતર્ગત શહેરમાં જુદીજુદી સાઇટ ખાતે જરૂરિયાતમંદ પરિવારોને આવાસો ફાળવવામાં આવ્યા છે. આ ફાળવણી બાદ નિયમિતપણે હપ્તા ભરવાના થતા હોય છે, પરંતુ આ પૈકી કેટલાક આવાસધારકો દ્વારા રૂડાનાં હપ્તા પેટે બાકી રહેતી રકમ આજદિન સુધી ભરવામાં આવી નથી. આ બાબતે તંત્ર દ્વારા આવા લાભાર્થીઓને વારંવાર લેખિત તેમજ મૌખિક જાણ કરાઈ હતી, છતાં આજ સુધી આવાસધારકો દ્વારા રૂડામાં બાકી રકમ જમા કરાવવામાં કોઈ જ રસ દાખવવામાં આવ્યો ન હતો. આ ગંભીર બેદરકારીને ધ્યાને લઈને રૂડાની બોર્ડ બેઠકમાં ઠરાવ પસાર કરવામાં આવ્યો હતો, જેના આધારે આ પ્રકારના લાંબા સમયથી ડિફોલ્ટર આવાસધારકોનાં આવાસો ત્વરિત ધોરણે રદ કરવામાં આવ્યા છે.
કઈ સોસાયટીના ક્યા મકાનની ફાળવણી રદ કરાઈ?
જે આવાસધારકોના આવાસો આ કાર્યવાહી હેઠળ રદ કરવામાં આવ્યા છે તેમાં મુખ્ય ચારેય સોસાયટીઓની વિગતો રૂડા દ્વારા જાહેર કરવામાં આવી છે. જેમાં (1) અવધ હાઉસિંગ કો. ઓપરેટીવ સર્વિસ સોસાયટી, રાજકોટ (ટી.પી.17, એફ.પી.89)ના મકાન નંબર B-705, (2) વૃંદાવન હાઉસિંગ કો. ઓપરેટીવ સર્વિસ સોસાયટી, રાજકોટ (ટી.પી.17, એફ.પી.95)ના મકાન નંબર C-803, (3) ઓમ હાઉસિંગ કો. ઓપરેટીવ સર્વિસ સોસાયટી, રાજકોટ (ટી.પી.17, એફ.પી.33/એ)ના મકાન નંબર D-1002 અને (4) આદર્શ હાઉસિંગ કો. ઓપરેટીવ સર્વિસ સોસાયટી, રાજકોટ (ટી.પી.10, એફ.પી.32/એ)ના મકાન નંબર B-804નો સમાવેશ થાય છે. આ તમામ મકાનોની ફાળવણી હવે રદ ગણવામાં આવશે.