રાજકોટ શહેરના ગોંડલ રોડ પર ટાટા મોટર્સના શોરૂમ પાસે આજે (4 મે, 2026) બપોરે પૂરપાટ ઝડપે આવી રહેલી સ્કોર્પિયો કાર અને ઇકો ગાડી વચ્ચે સર્જાયેલા ભયાનક અકસ્માતમાં બે વ્યક્તિઓના ઘટનાસ્થળે જ કરુણ મોત નીપજ્યા છે. આ અકસ્માતમાં અન્ય પાંચ મુસાફરો ગંભીર રીતે ઈજાગ્રસ્ત થતા તેમને તાત્કાલિક સારવાર અર્થે રાજકોટ સિવિલ હોસ્પિટલ ખસેડવામાં આવ્યા છે.
ઇકો કારને સામેથી સ્કોર્પિયોએ ધડાકાભેર ટક્કર મારી આજે બપોરે આશરે 2 વાગ્યાના સુમારે ગોંડલથી લૌકિક પ્રસંગ (મરણના અવસર)માં હાજરી આપીને પરત ફરી રહેલા પરિવારની ઇકો કારને સામેથી આવતી સ્કોર્પિયોએ ધડાકાભેર ટક્કર મારી હતી. આ અકસ્માતમાં થાનગઢના રહેવાસી બે સગા ભાઈઓના મોત થયા છે. પરિવારના બે મોભીઓના એકસાથે મૃત્યુથી પાટડીયા પરિવારમાં શોકનું મોજું ફરી વળ્યું છે.