સુરતના પાલ વિસ્તારમાં રહેતી એક 45 વર્ષીય પરિણીત મહિલાને જીમ ટ્રેનરે પોતાની પ્રેમજાળમાં ફસાવી બ્લેકમેલ કરી હોવાની ચોંકાવનારી ઘટના સામે આવી છે. આરોપી જીમ ટ્રેનરે મહિલાના પતિને ધમકાવી 5 લાખ રૂપિયાની ખંડણી માંગી હતી અને જાનથી મારી નાખવાની ધમકી આપી હતી. સુરત શહેર SOGએ આ મામલે ત્વરિત કાર્યવાહી કરી આરોપી શબ્બીર અસગરભાઈ ટૂંકવાલાની ધરપકડ કરીને કાર્યવાહી હાથ ધરી છે.
જીમ ટ્રેનરે પરિણીતાને પ્રેમજાળમાં ફસાવી લીધી આ ઘટનાની વિગત મુજબ, ભોગ બનનાર મહિલા આજથી સાતેક વર્ષ પહેલાં સિટીલાઈટ વિસ્તારમાં આવેલા ‘પુજા L1’ જીમમાં જતી હતી. આ સમયે ત્યાં જીમ ટ્રેનર તરીકે કાર્યરત શબ્બીર અસગરભાઈ ટૂંકવાલાએ જીમ એક્ટિવિટી શીખવવાના બહાને મહિલા સાથે નિકટતા કેળવી હતી. આરોપીએ લોભ-લાલચ આપી મહિલાને પોતાની પ્રેમજાળમાં ફસાવી લીધી હતી.
લગ્નજીવન બચાવવા મહિલાના પતિએ આરોપીનો સંપર્ક કર્યો આ સંબંધોને કારણે મહિલાના સંસારમાં કંકાસ શરૂ થયો હતો. જ્યારે મહિલાના પતિને આ વાતની જાણ થઈ, ત્યારે તેમણે પોતાનું લગ્નજીવન બચાવવા આરોપીનો સંપર્ક કર્યો હતો, પરંતુ આરોપીએ સુધરવાને બદલે ખંડણીખોરનો અવતાર ધારણ કર્યો હતો.