એવિએશન પર નજર રાખતી સંસ્થા DGCA એ નોન-શેડ્યુલ્ડ ઓપરેટર (ચાર્ટર્ડ પ્લેન, એર એમ્બ્યુલન્સ) માટે નિયમો કડક કર્યા છે. હવે ઓપરેટરોએ પોતાની વેબસાઇટ પર પ્લેનની મેન્ટેનન્સ હિસ્ટ્રી સાર્વજનિક કરવી પડશે. આ સાથે એ પણ જણાવવું પડશે કે વિમાન કેટલું જૂનું છે.
ખરેખર ઝારખંડમાં એક ચાર્ટર્ડ પ્લેન ક્રેશ થયા બાદ DGCA એ મંગળવારે આવા તમામ ઓપરેટરો સાથે એક મીટિંગ કરી. મીટિંગમાં ઓપરેટરોને તેમના સેફ્ટી રેકોર્ડના આધારે રેન્ક કરવાનો પણ પ્રસ્તાવ મૂકવામાં આવ્યો છે. જોકે આ રેન્કિંગ ડિરેક્ટોરેટ જનરલ ઓફ સિવિલ એવિએશન (DGCA) ની વેબસાઇટ પર મૂકવામાં આવશે.
DGCA એ આ નિર્ણય છેલ્લા એક મહિનામાં નોન-શેડ્યુલ્ડ ઓપરેટર દ્વારા સંચાલિત બે ચાર્ટર્ડ વિમાનો ક્રેશ થયા બાદ લીધો છે. નોન-શેડ્યુલ્ડ ઓપરેટર એવી એરલાઇન/કંપનીઓ હોય છે, જે નિયમિત ટાઈમ-ટેબલવાળી કોમર્શિયલ ફ્લાઈટ ચલાવતી નથી, પરંતુ જરૂરિયાત કે બુકિંગના આધારે ઉડાન ભરે છે.