એક નવો પાકિસ્તાની ડેટિંગ શો, “લજાવાલ ઇશ્ક”, હજુ સુધી રિલીઝ થયો નથી, છતાં તેણે વિવાદ ઉભો કર્યો છે. આ શો 29 સપ્ટેમ્બરના રોજ યુટ્યુબ પર રિલીઝ થશે.
આ શોમાં ચાર પુરુષો અને ચાર મહિલાઓ ઇસ્તંબુલના એક વૈભવી વિલામાં સાથે રહેતા હશે, જ્યાં તેમની દરેક ગતિવિધિ કેમેરામાં રેકોર્ડ કરવામાં આવશે. સ્પર્ધકો વિવિધ ટાસ્કમાં ભાગ લેશે, સંબંધો બનાવશે અને અંતે, એક યુગલ વિજયી બનશે. 100 એપિસોડ હશે.
પાકિસ્તાનમાં, લગ્ન પહેલાં પોતાના જીવનસાથી સિવાય અન્ય કોઈની સાથે ડેટિંગ કરવું અથવા સંબંધ બાંધવો એ ખોટું માનવામાં આવે છે. ધાર્મિક જૂથોએ આને બિન-ઈસ્લામિક ગણાવ્યું છે. લોકોએ સોશિયલ મીડિયા પર બહિષ્કારની હાકલ કરી છે.
પાકિસ્તાની અભિનેત્રી આયેશા ઓમર દ્વારા હોસ્ટ કરાયેલ આ શોનું શૂટિંગ ઇસ્તંબુલમાં કરવામાં આવ્યું છે અને તે તુર્કીના “આસ્ક અદાસી” અને “લવ આઇલેન્ડ” જેવા આંતરરાષ્ટ્રીય શોથી પ્રેરિત છે.