રાજકોટ જિલ્લા પંચાયતના નાયબ વિકાસ અધિકારી ઇલાબેન ગોહિલ પાસેથી ડીડીઓએ દ્વારા મહેસૂલ અને મહેકમ વિભાગનો ચાર્જ લઇ લેવાતાં ખળભળાટ મચી ગયો છે. ડેપ્યુટી ડીડીઓ ગોહિલ સામે છેલ્લા થોડા સમયથી રેવન્યૂ બાર એસોસિએશન અને સ્ટાફની સતત ફરિયાદના પગલે આ કાર્યવાહી કરાયાનું માનવામાં આવી રહ્યું છે. જો કે સત્તાવાર કારણ હજુ જાહેર થયું નથી.
રાજકોટ જિલ્લા પંચાયતમાં ડેપ્યુટી ડીડીઓ તરીકે ઇલાબેન ગોહિલે ચાર્જ સંભાળ્યો ત્યારે તેમને મહેસૂલ, મહેકમ અને વહીવટી વિભાગનો ચાર્જ અપાયો હતો અને ત્યારબાદ વિકાસ વિભાગની મહત્વની જવાબદારી પણ ઇલાબેનને સોંપવામાં આવી હતી.
દરમિયાનમાં ડીડીઓ ડો.નવનાથ ગવ્હાણે ગુરૂવારે એકાએક મહેકમની કામગીરીનો હવાલો ડીપીઇઓ દિક્ષિત પટેલ અને મહેસૂલ વિભાગની કામગીરીનો હવાલો નાયબ જિલ્લા વિકાસ અધિકારી જે.એન.ગોસ્વામીને સોંપવામાં આવ્યો છે. જ્યારે હવે ઇલાબેન પાસે વહીવટી વિભાગ અને વિકાસ વિભાગની બે કામગીરી રહી છે.
નાયબ જિલ્લા વિકાસ અધિકારી ઇલાબેન ગોહિલ હાજર થયા ત્યારથી નાના-મોટા વિવાદો થતા રહ્યા છે. કર્મચારીઓને સજાના કેસમાં તેમણે આપેલા ચુકાદાઓ પણ વિવાદમાં રહ્યા હતા અને છેલ્લે રેવન્યૂ બાર એસોસિએશન સાથે વિવાદ થતા મામલો ગાંધીનગર સુધી પહોંચતા આ નિર્ણય લેવાયાનું પંચાયતના ચર્ચાઇ રહ્યું છે.