જમ્મુ-કાશ્મીરના પુંછમાં 4 મેના રોજ એરફોર્સના કાફલા પર થયેલા આતંકવાદી હુમલામાં સામેલ ત્રણ શંકાસ્પદ લોકોના નામ અને તસવીરો સામે આવી છે. આ આતંકીઓમાં એક પાકિસ્તાની આર્મીનો પૂર્વ કમાન્ડો ઇલ્યાસ ઉર્ફે ફૌજી છે, બીજો લશ્કર કમાન્ડર અબુ હમઝા અને ત્રીજો પાકિસ્તાની આતંકવાદી હદુન છે.
આ હુમલામાં એરફોર્સનો એક જવાન શહીદ થયો હતો અને ચાર ઘાયલ થયા હતા. હુમલામાં સામેલ આતંકવાદીઓના સ્કેચ જાહેર કરવાની સાથે સેનાએ તેમના પર 20 લાખ રૂપિયાનું ઈનામ પણ જાહેર કર્યું છે. હુમલાના સંદર્ભમાં પૂછપરછ માટે લગભગ 20 લોકોની અટકાયત કરવામાં આવી છે. બુધવારે સતત પાંચમા દિવસે સુરક્ષાદળો દ્વારા સર્ચ ઓપરેશન ચાલુ રહ્યું હતું.
જમ્મુ-કાશ્મીરના કુલગામના રેડવાની પાઈન વિસ્તારમાં બુધવારે સુરક્ષાદળો અને આતંકવાદીઓ વચ્ચે ફરી એન્કાઉન્ટર શરૂ થયું છે. આ પહેલા મંગળવારે એન્કાઉન્ટર દરમિયાન સુરક્ષા દળોએ બે આતંકીઓને ઠાર કર્યા હતા.
માર્યા ગયેલા લોકોમાં આતંકવાદી લશ્કરનો ટોપ કમાન્ડર બાસિત ડાર પણ હતો, જેના પર 10 લાખ રૂપિયાનું ઈનામ હતું. તે કાશ્મીરમાં અનેક લોકોની હત્યામાં સામેલ છે. માર્યો ગયેલો બીજો આતંકી ફહીમ અહેમદ હતો, જે આતંકવાદીઓને મદદ કરતો હતો.