રાજકોટમાં ભરઉનાળાની આકરી ગરમી વચ્ચે સ્થાનિક નાગરિકો માટે ચિંતાજનક સમાચાર સામે આવ્યા છે. મહાનગરપાલિકાના સેન્ટ્રલ ઝોન હેઠળ આવતા બે મહત્વના વોર્ડના વિસ્તારોમાં આગામી સમયમાં પાણી કાપ ઝીંકવામાં આવ્યો છે. મહાપાલિકા તંત્રએ જાહેરાત કર્યા મુજબ આગામી 12 જૂન,2026ને શુક્રવારના રોજ શહેરના વોર્ડ નંબર 7 (પાર્ટ) અને વોર્ડ નં.13 (પાર્ટ)માં સમાવિષ્ટ વિવિધ વિસ્તારોમાં પાણી વિતરણ સંપૂર્ણપણે બંધ રાખવામાં આવશે. તંત્ર દ્વારા લેવાયેલા આ નિર્ણયને કારણે હજારો નાગરિકોને ભારે હાલાકીનો સામનો કરવો પડશે.
ગુરુકુળ હેડવર્કસ ખાતેથી પાણીની સપ્લાય રોકવી અનિવાર્ય મહાનગરપાલિકાના તંત્ર દ્વારા આ પાણી કાપ પાછળ ટેકનિકલ અનિવાર્યતાનું કારણ દર્શાવવામાં આવ્યું છે. સેન્ટ્રલ ઝોનના અધિકારીઓના જણાવ્યા અનુસાર, ગુરુકુળ હેડવર્કસથી નીકળતી 500 એમ.એમ. એમ.એસ. ડાયાની મુખ્ય લાઈનમાં તાકીદનું રીપેરીંગ કામ કરવાનું આયોજન કરવામાં આવ્યું છે. આ મેઈન પાઈપલાઈનના સમારકામ માટે ગુરુકુળ હેડવર્કસ ખાતેથી પાણીની સપ્લાય રોકવી અનિવાર્ય છે.
12 જૂન શુક્રવારે દૈનિક પાણી વિતરણ નહીં થાય આ ટેકનિકલ કામગીરી શુક્રવારે સવારથી જ હાથ ધરવામાં આવનાર હોવાથી, આ હેડવર્કસ સાથે જોડાયેલા તમામ વિસ્તારોમાં તે દિવસે મનપા દ્વારા અપાતું દૈનિક પાણી વિતરણ બંધ રહેશે. તંત્ર દ્વારા આ અંગે અગાઉથી જાણ કરીને નાગરિકોને સહકાર આપવા અને પાણીનો સંગ્રહ કરી રાખવા અપીલ કરવામાં આવી છે.
વોર્ડ-7, 13ના વિસ્તારોમાં પાણી નહીં આવે આ આયોજિત પાણી કાપના કારણે સેન્ટ્રલ ઝોનના મોટા રહેણાંક વિસ્તારો પ્રભાવિત થવાના છે. વોર્ડ નં.7 (પાર્ટ)માં આવતા લોહાનગર(પાર્ટ) તથા જૈન ચાલ જેવા શ્રમિક અને મધ્યમવર્ગીય વિસ્તારોમાં શુક્રવારે પાણી નહીં આવે. બીજી તરફ, સૌથી વ્યાપક અસર વોર્ડ નં.13 (પાર્ટ)ના વિસ્તારોમાં જોવા મળશે. આ વોર્ડના મુખ્ય વિસ્તારો જેવા કે જુની તથા નવી પપૈયાવાડી, પંચશીલ સોસાયટી (પાર્ટ), રાધાકૃષ્ણ સોસાયટી (પાર્ટ), ગુણાતીતનગર, જે. ડી. પાઠક પ્લોટ, ટપુભવાન પ્લોટ, અંબાજી કડવા પ્લોટ, લોધેશ્વર અને માલવિયા નગર જેવા ભરચક રહેણાંક વિસ્તારોમાં પાણી વિતરણ બંધ રહેશે. આ ઉપરાંત વિનય સોસાયટી, શિવનગર, સ્વાશ્રય સોસાયટી, રામનગર, વેદવાડી, ડાલીબાઇ આવાસ યોજના, કૃષ્ણનગર, નવલનગર, ભોલેનાથ સોસાયટી, ગુરુપ્રસાદ સોસાયટી, ત્રિવેણી નગર અને કૈલાશનગર સહિતના વિસ્તારોમાં પણ શુક્રવારે જળસંકટ જેવી સ્થિતિ નિર્માણ પામશે.