લોકસભામાં વિપક્ષના નેતા રાહુલ ગાંધીએ કોટાના દશેરા મેદાનમાં વિદ્યાર્થીઓ સાથે સંવાદ કર્યો. કાર્યક્રમ ‘છાત્રો કી ગૂંજ’માં રાહુલે કહ્યું- આ કાર્યક્રમ કોઈ રાજકારણનો કાર્યક્રમ નથી, આ યુવાનો, વિદ્યાર્થીઓનો અવાજ ઉઠાવવા માટેનું મંચ છે. આજે ફક્ત વિદ્યાર્થીઓ અને યુવાનોની વાત થશે.
રાહુલ ગાંધીએ શિક્ષણ વ્યવસ્થા પર આકરા પ્રહાર કરતા કહ્યું- હિન્દુસ્તાનની શિક્ષણ પ્રણાલી પોતાના બાળકોને પ્રેશરાઇઝ કરે છે. આ તેમને સ્ટ્રેસ આપે છે. આ બાળકોને દબાવે છે અને કચડે છે, જે દેશના ભવિષ્ય માટે બિલકુલ યોગ્ય નથી. હું ઈચ્છું છું કે આપણે બધા મળીને તેની સામે લડીએ, જેથી ભવિષ્યમાં કોઈ પણ બાળકને (આત્મહત્યા જેવું) આવું આત્મઘાતી પગલું ન ભરવું પડે.
રાહુલ ગાંધીએ કહ્યું- દેશના યુવાનો પાસે શિક્ષણમાં ફક્ત પાંચ જ વિકલ્પો શા માટે છે? દરેક વ્યક્તિ ડોક્ટર કે એન્જિનિયર જ શા માટે બનવા માંગે છે, જ્યારે બીજા ઘણા કરિયર વિકલ્પો ઉપલબ્ધ છે.
રાહુલ ગાંધીએ એક વિદ્યાર્થીનીનો સુસાઈડ નોટ પણ બતાવી અને કહ્યું- આ આકાંક્ષાની નિષ્ફળતા નથી, પરંતુ આ આપણી શિક્ષણ પ્રણાલીની નિષ્ફળતા છે.
આ પહેલાં, રાહુલ ગાંધી બુધવારે બપોરે 3:30 વાગ્યે ચાર્ટર પ્લેનથી કોટા પહોંચ્યા. એરપોર્ટ પર પ્રદેશાધ્યક્ષ ગોવિંદ સિંહ ડોટાસરા, વિરોધ પક્ષના નેતા ટીકારામ જૂલી, પૂર્વ સીએમ અશોક ગેહલોત, સચિન પાયલટ સહિત કોંગ્રેસના વરિષ્ઠ નેતાઓએ તેમનું સ્વાગત કર્યું.
રાહુલ ગાંધીના સ્વાગત માટે મોટી સંખ્યામાં કાર્યકરો પણ એરપોર્ટ પહોંચ્યા હતા. રાહુલ એરપોર્ટ લાઉન્જમાંથી બહાર નીકળ્યા અને ગાડીમાં બેસવા લાગ્યા, ત્યારે મોટી સંખ્યામાં કાર્યકરો તેમના સ્વાગત માટે આગળ વધવા લાગ્યા. પોલીસે તેમને હટાવ્યા. રાહુલના કાફલાને એરપોર્ટમાંથી બહાર કાઢવામાં મુશ્કેલી પડી.
કોટા પહોંચતા પહેલાં રાહુલે X પર લખ્યું હતું- આજે કોટાથી આપણે તે લડાઈ શરૂ કરીશું, જેનો એક જ હેતુ છે- કોઈ બાળકના સપના આ રીતે તૂટે નહીં. કોઈ માતા-પિતાને ફરી ક્યારેય પોતાના બાળકને આ રીતે ગુમાવવું ન પડે. દરેક પરિવારની આ પીડા હવે ‘વિદ્યાર્થીઓની ગુંજ’ બનીને આખા દેશમાં ગુંજશે.