રાજકોટ જિલ્લાના ગોંડલ તાલુકાના ડૈયા ગામે રહેતા અને બિલ્ડિંગ મટીરીયલ્સનો વેપાર કરતાં નિતેશભાઈ રાઠોડ (ઉ.વ.40)ને હનીટ્રેપમાં ફસાવી રૂ.1.07 લાખની મત્તા પડાવી લેનાર રાજકોટની ટોળકીને પડધરી પોલીસે ઝડપી પાડી કાયદેસરની કાર્યવાહી હાથ ધરી છે. આ ટોળકી સાથે અન્ય કોઈ આરોપી સંડોવાયેલ છે કે કેમ? તેમજ અન્ય કેટલા લોકોને આ ટોળકીએ પોતાની જાળમાં ફસાવી શિકાર બનાવ્યા છે તે દિશામાં પોલીસે વધુ તપાસ હાથ ધરી છે.
રાજકોટ જિલ્લાના ગોંડલ તાલુકાના ડૈયા ગામે રહેતા અને બિલ્ડિંગ મટીરીયલ્સનો વેપાર કરતાં નિતેશભાઈ રાઠોડ (ઉ.વ.40)ને એક અઠવાડિયા પહેલાં વ્હોટ્સએપમાં અજાણી મહિલાનો કોલ આવ્યો હતો અને તમે કોઈ તેલના ડબ્બા વેચતા ભાઈ બોલો છે એવું કહીને વાત કરી હતી. મહિલાએ પોતાની ઓળખ આપતાં જણાવ્યું હતું કે, પોતે પડધરી નજીક એક સેવાકીય આશ્રમમાં ટ્રસ્ટ ચલાવે છે. જે બાદ મહિલા વારંવાર વેપારીને ફોન કરીને પોતના સેવાકાર્ય વિશે વાતચીત કરતી રહેતી હતી. ગત તારીખ 5.7.2024ના રોજ વેપારી રાજકોટ આવ્યા હતા તે દરમિયાન મહિલાનો ફોન આવેલો અને પડધરી નજીક ખજૂરડી ગામમાં આવેલા આશ્રમમાં મળવા માટે બોલાવ્યા હતા.
વેપારી આશ્રમે જતાં વચ્ચે રસ્તામાં મોણપરના પાટિયા પાસેથી આ મહિલા વેપારી સાથે કારમાં બેસી ગઈ હતી. આશ્રમે પહોંચતા જ પાછળથી બે અજાણ્યા શખસો આવેલા અને આ મહિલાને ત્યાંથી જવા દીધી હતી. આ શખ્સોએ પોતે પોલીસ હોવાનું જણાવી તું જે મહિલા સાથે હતો એ ડ્રગ્સનો ધંધો કરે છે અને તું પણ એની સાથે ધંધો કરે છે તેવું કહીને વેપારીને કારમાં બેસાડી નજીકમાં આવેલો ડેમ બાજુ લઈ ગયા હતા. જે બાદ આરોપીએ પતાવટ કરવી હોય તો 3 લાખ થશે તેવું કહેતા વેપારીએ પોલીસ મથકે લઈ જઈને કાનૂની કાર્યવાહી કરવા માટે કહ્યું હતું.