ફેબ્રુઆરી મહિનામાં વિદેશી પોર્ટફોલિયો રોકાણકારો (FPIs) એ ભારતીય શેરબજારમાં જબરદસ્ત વાપસી કરી છે. ડિપોઝિટરીના આંકડા મુજબ, આ મહિને વિદેશી રોકાણકારોએ ₹22,615 કરોડના શેર ખરીદ્યા. આ છેલ્લા 17 મહિનામાં વિદેશી રોકાણનું સૌથી ઊંચું સ્તર છે. આ પહેલા સપ્ટેમ્બર 2024માં FPIs એ ₹57,724 કરોડનું રોકાણ કર્યું હતું.
બજાર નિષ્ણાતોનું માનવું છે કે ભારત અને અમેરિકા વચ્ચે થયેલી વચગાળાની ટ્રેડ ડીલ, શેરોના ભાવમાં સુધારો અને કંપનીઓના ત્રીજા ક્વાર્ટર (Q3) ના શાનદાર પરિણામોએ રોકાણકારોનો વિશ્વાસ પાછો લાવ્યો છે.
ત્રણ મહિનાની ભારે વેચવાલી પછી પાછા ફર્યા રોકાણકારો
વર્ષ 2026ની શરૂઆત વિદેશી રોકાણકારો માટે ઘણી ખરાબ રહી હતી. ફેબ્રુઆરીમાં થયેલી આ ખરીદી પહેલા સતત ત્રણ મહિના સુધી FPIs એ બજારમાંથી પૈસા પાછા ખેંચ્યા હતા.
એકંદરે વર્ષ 2025માં વિદેશી રોકાણકારોએ ભારતીય ઇક્વિટીમાંથી લગભગ 18.9 બિલિયન ડોલર એટલે કે 1.72 લાખ કરોડ રૂપિયા પાછા ખેંચ્યા છે. આ વેચવાલીનું મુખ્ય કારણ ડોલર સામે રૂપિયામાં નબળાઈ, વૈશ્વિક વેપાર તણાવ અને અમેરિકી ટેરિફનો ડર હતો.