કોકરોચ જનતા પાર્ટી (CJP)ના સ્થાપક અભિજીત દીપકે દાવો કર્યો છે કે જંતર-મંતર પર ચાલી રહેલા પ્રદર્શન દરમિયાન કેટલાક લોકોએ સામાજિક કાર્યકર સોનમ વાંગચુક પર હુમલો કરવાનો પ્રયાસ કર્યો હતો. તેમના મતે, વાંગચુક તરફ પથ્થર ફેંકવામાં આવ્યો હતો, પરંતુ તેમને ઈજા થઈ ન હતી.
દીપકે શુક્રવારે મોડી રાત્રે સોશિયલ મીડિયા પર પોતાની પોસ્ટમાં કહ્યું- મેં થોડા દિવસો પહેલા જ ચેતવણી આપી હતી કે પ્રદર્શનને રોકવા માટે લોકોને મોકલવામાં આવશે. મને પોલીસના આંતરિક સૂત્ર પાસેથી આ માહિતી મળી હતી. દીપકે કહ્યું- જો વાંગચુકને કંઈ થશે તો તેની જવાબદારી સરકારની રહેશે.
પેપર લીક કેસમાં શિક્ષણ મંત્રી ધર્મેન્દ્ર પ્રધાનના રાજીનામા સહિત અનેક માંગણીઓને લઈને વાંગચુકના ઉપવાસ 21મા દિવસે પહોંચી ગયા છે. તેમના સમર્થનમાં અભિનેતા હૃતિક રોશને ઇન્સ્ટાગ્રામ સ્ટોરી પર લખ્યું- મને પણ વિદ્યાર્થીઓના માનસિક તણાવનો અહેસાસ ત્યારે થયો, જ્યારે મેં મારી એક ફિલ્મમાં શિક્ષકની ભૂમિકા ભજવી હતી.
જંતર-મંતરના ધરણા પર બેઠેલા વાંગચુકે શુક્રવારે મોડી રાત્રે જાહેર કરેલા એક વીડિયોમાં કહ્યું- હું હજી જીવતો છું. મારું 20% શરીર જતું રહ્યું છે. ચરબી પછી સ્નાયુઓ જશે. પછી મગજ… પણ હજી તે નોબત આવી નથી.
આ પહેલા તેમણે કહ્યું હતું- 20 જુલાઈએ કોઈ પણ ભોગે સંસદ માર્ચ થશે અને હું જીવતો રહીશ. લોકો ન આવ્યા તો હું ભૂત બનીને પાછો આવીશ.’ કોકરોચ જનતા પાર્ટીએ ધર્મેન્દ્ર પ્રધાનના રાજીનામાને લઈને 20 જુલાઈએ સંસદ માર્ચનું આહ્વાન કર્યું છે.