વિરાટ કોહલી ક્રિકેટના મેદાન પર કેટલા મોટા લીજેન્ડ છે તે તો બધા જાણે જ છે, પરંતુ હવે તેનો માસ્ટર ક્લાસ બિઝનેસની દુનિયામાં પણ જોવા મળી રહ્યો છે. તાજેતરમાં લોન્ચ થયેલી તેની ‘One8’ બ્રાન્ડના શૂઝ બજારમાં માત્ર ચાલી નથી રહ્યા, પરંતુ તે હુસેન બોલ્ટની ઝડપે દોડી રહ્યા છે. અહેવાલો અનુસાર, લોન્ચિંગના માત્ર 24 કલાકમાં જ 1,50,000 શૂઝ વેચાઈ ગયા!
24 કલાકના બિઝનેસનું ગણિત!
એક શૂઝની શરૂઆતી કિંમત ₹9,230 છે. તો જો આપણે 24 કલાકના બિઝનેસ માટે શરૂઆતી કિંમતે ગણતરીએ કરીએ તો એ હિસાબે 1,50,000 (વેચાયેલી પેર)* 9,230 (શરૂઆતી કિંમત)= 1,38,45,00,000 (ટોટલ કમાણી). એટલે કે માત્ર એક જ દિવસમાં અંદાજે 140 કરોડ રૂપિયાનો બિઝનેસ થયો છે. વિરાટના ટેસ્ટ ક્રિકેટના રનની જેમ જ આ જંગી આંકડો પણ સોશિયલ મીડિયા પર ધૂમ મચાવી રહ્યો છે. વિરાટ કોહલીની બ્રાન્ડના શૂઝની એક જોડીની શરૂઆતી કિંમત ₹9,230 છે. વિરાટે તેના ટેસ્ટ ક્રિકેટ રન ટેલીનું પ્રતિનિધિત્વ કરતા આંકડાના આધારે શૂઝની કિંમત નક્કી કરી છે.
વિરાટ કોહલી જેટલા મોટા ખેલાડી છે, તેટલી જ મોટી તેની પર્સનલ બ્રાન્ડ વેલ્યુ છે. તેની અદભુત ફિટનેસના કારણે દુનિયાની મોટી મોટી કંપનીઓ તેને બ્રાન્ડ એમ્બેસેડર બનાવવા માટે કરોડો રૂપિયા ખર્ચવા તૈયાર રહે છે. સ્પોર્ટ્સ શૂઝ બનાવતી પ્રખ્યાત જર્મન કંપની ‘Puma’ પણ તેમાંથી એક છે. વર્ષ 2017માં વિરાટે પૂમા સાથે અંદાજે 110 કરોડ રૂપિયાની ડીલ કરી હતી અને તે ભારતમાં કંપનીનો સૌથી મોટો ચહેરો બન્યો હતો.