જસદણના નવા બસ સ્ટેશન વિસ્તારમાં આવેલી એક હાર્ડવેરની દુકાનમાં અચાનક આગ ભભૂકતાં અફરાતફરી મચી ગઈ હતી.
ગુરૂકૃપા રેસ્ટોરન્ટની નીચે આવેલી સરદાર હાર્ડવેર નામની દુકાનમાં લાગેલી આ આગમાં સદનસીબે કોઈ જાનહાનિ થઈ નથી, પરંતુ માલસામાનને નુકસાન પહોંચ્યું હતું. દુકાનમાંથી અચાનક ધુમાડાના ગોટેગોટા નીકળવા લાગતાં લોકો ચોંકયા હતા.
જોતજોતામાં આગે વિકરાળ સ્વરૂપ ધારણ કરી લીધું હતું. પ્રાથમિક દ્રષ્ટિએ આ આગ શોર્ટ સર્કિટના કારણે લાગી હોવાનું અનુમાન છે ,ભીડ ધરાવતા વિસ્તારમાં આગ લાગતા આસપાસના વેપારીઓના પેટમાં ફાળ પડી ગઈ હતી.
આગની જાણ થતા જ જસદણ પાલિકાની ફાયર ફાઈટરની ટીમ દોડી ગઈ હતી અને જવાનોએ ભારે જહેમત બાદ આગ પર કાબૂ મેળવ્યો હતો. ફાયર વિભાગની આ ત્વરિત કામગીરીને કારણે આગ વધુ ફેલાતી અટકી હતી અને મોટી હોનારત ટળી હતી.