સાતમી ઓક્ટોબરે ઇઝરાયલ પર આતંકી સંગઠન હમાસે હુમલો કર્યા બાદથી ઇઝરાયલે ગાઝા પટ્ટી પર સતત હવાઇ હુમલાઓ કરીને વિશ્વના દેશોની ચિંતા વધારી દીધી છે. કેટલાક અરબ દેશો ઇઝરાયલની ટિકા કરી રહ્યા છે પરંતુ પેલેસ્ટિનિયનોને શરણ આપવા માટે તૈયાર નથી. ઇઝરાયલે ઉત્તર ગાઝાના 11 લાખ લોકોને વિસ્તારો ખાલી કરવા માટે કહ્યું છે. ત્યારબાદ હજારો પેલેસ્ટિનિયનો ગાઝામાંથી નિકળવા માટે ઇજિપ્તની સરહદ પર રાફેહ બોર્ડરના ખુલવાની રાહ જોઇ રહ્યા છે. જો કે ઇજિપ્તના રાષ્ટ્રપતિ અબ્દુલ ફત્તેહ અલ સિસીએ કહ્યું છે કે અમે પેલેસ્ટિનિયનોને પોતાના દેશમાં પ્રવેશ આપવા તૈયાર નથી.
સિસીનુ કહેવુ છે કે ઇઝરાયલનો હેતુ પેલેસ્ટિનિયન લોકોને ઇજિપ્તમાં ઘુસાડવાનો છે, પરંતુ ઇજિપ્ત ઇઝરાયલની ચાલને સફળ થવા દેશે નહીં. કારણ કે આના કારણે સમગ્ર ક્ષેત્રની શાંતિ ભંગ થઇ જશે. બીજી બાજુ વેસ્ટ બેંક સાથે જોડાયેલા જોર્ડને પણ પેલેસ્ટિનિયન લોકોને શરણ આપવાનો ઇન્કાર કરી દીધો છે.