યુરોપિયન દેશ આયર્લેન્ડના ‘ગ્રેસ્ટોન્સ’ શહેરે દુનિયાને તે રસ્તો બતાવ્યો છે, જેની શોધ આજે દરેક પરેશાન માતા-પિતાને છે. આ વિસ્તારના 22 હજાર લોકોએ ભેગા મળીને નક્કી કર્યું છે કે તેઓ પોતાના બાળકોનું બાળપણ ‘સ્માર્ટફોન’ના હવાલે નહીં થવા દે. ‘ઇટ ટેક્સ એ વિલેજ’ નામના આ આંદોલને ટેકનોલોજી સામે એક સામૂહિક દીવાલ ઊભી કરી દીધી છે. ફોનની જગ્યાએ બાળકો માટે ‘યુથ કેફે’ અને રમતગમતની પ્રવૃત્તિઓ વધારવામાં આવી છે.
‘ફોન-ફ્રી બીચ પાર્ટી’ જેવા આયોજનો શરૂ થયા છે. ગ્રેસ્ટોન્સની આ પહેલથી પ્રેરિત થઈને હવે આયર્લેન્ડના અન્ય શહેરો કોર્ક અને ડબલિનએ પણ ‘નો સ્માર્ટફોન કોડ’ અપનાવ્યો છે. દેશની સરહદની બહાર બ્રિટન અને સ્પેનના બાર્સેલોનામાં પણ વાલીઓના ગ્રુપોએ આવી જ પહેલ શરૂ કરી છે. કોવિડ લોકડાઉન પછી જ્યારે ગ્રેસ્ટોન્સમાં શાળાઓ ખુલી, ત્યારે તસવીર બદલાઈ ગઈ હતી.