અમેરિકાના રાષ્ટ્રપતિ ડોનાલ્ડ ટ્રમ્પે ફેડરલ રિઝર્વ ગવર્નર લિસા કૂકને તેમના પદ પરથી હટાવી દીધા છે. ટ્રમ્પે તેમના સોશિયલ મીડિયા પ્લેટફોર્મ ટ્રુથ સોશિયલ પર આ અંગે માહિતી આપી હતી. લિસા કૂકની નિમણૂક 2022માં તત્કાલીન રાષ્ટ્રપતિ જો બાઈડન દ્વારા કરવામાં આવી હતી.
તેમણે કહ્યું- લિસા કૂકને તાત્કાલિક અસરથી ફેડરલ રિઝર્વના બોર્ડ ઓફ ગવર્નર્સમાંથી દૂર કરવામાં આવી રહ્યા છે. આ પગલાથી યુએસ સેન્ટ્રલ બેંક એટલે કે ફેડરલ રિઝર્વની સ્વતંત્રતા અંગે એક નવો વિવાદ ઉભો થયો છે. એવું માનવામાં આવે છે કે આ મામલો સુપ્રીમ કોર્ટમાં જઈ શકે છે.
તાજેતરમાં, તેમના પર મોર્ટગેજ છેતરપિંડી (હોમ લોન છેતરપિંડી)નો આરોપ મૂકવામાં આવ્યો હતો. આ આરોપો ફેડરલ હાઉસિંગ ફાઇનાન્સ એજન્સી (FHFA) ના ડિરેક્ટર બિલ પુલ્ટે દ્વારા લગાવવામાં આવ્યા હતા, જેઓ ટ્રમ્પના કટ્ટર સમર્થક અને ફેડરલ રિઝર્વના ચેરમેન જેરોમ પોવેલના ટીકાકાર માનવામાં આવે છે.