‘ક્યોંકિ સાસ ભી કભી બહુ થી’ સિઝન 2 ટૂંક સમયમાં ટીવી પર પરત ફરી રહી છે. ભારતીય ટેલિવિઝનનાં સૌથી પ્રખ્યાત ઓન-સ્ક્રીન કપલ્સમાંથી એક તુલસી અને મિહિર ફરી એકવાર પાછાં ફરી રહ્યાં છે. આ શો સ્મૃતિ ઈરાનીના અભિનય અને ટેલિવિઝન સ્ક્રીન પર કમબેકને ચિહ્નિત કરે છે. નિર્માતાઓ શોને સારી રીતે પ્રમોટ કરી રહ્યા છે. તાજેતરમાં શોના જૂના કલાકારો ટાઇટલ ટ્રેકને શૂટ કરવા માટે ભેગા થયા છે. ચેનલ દ્વારા શૂટિંગનો BTS (સ્ક્રીન પાછળનાં દૃશ્યો) વીડિયો શેર કરવામાં આવ્યો છે.
આ વીડિયો શેર કરી લખવામાં આવ્યું છે, “કેમેરા પાછળ મિત્રતા, હાસ્ય અને ઘણી યાદો છુપાયેલી છે. તુલસી સાથેની સફર ફરી શરૂ થાય છે, શું તમે પણ સાથે જોડાશો? 29 જુલાઈથી રાત્રે 10:30 વાગ્યે #KyunkiSaasBhiKabhiBahuThi જુઓ.”
વીડિયોમાં શક્તિ આનંદ, રિતુ સેઠ, ગૌરી પ્રધાન, હિતેન તેજવાણી, અમર ઉપાધ્યાય, કમલિકા, કેતકી દવે જેવાં કલાકારો સાથે શૂટિંગ કરતાં જોઈ શકાય છે. હિતેન તેજવાણીએ પહેલી સિઝનમાં કરણ વિરાણીની ભૂમિકા ભજવી હતી. કેતિકા દવેએ દક્ષા વિરાણીની ભૂમિકા ભજવી હતી. કમલિકા ગુહા અને શક્તિ આનંદ પણ વિરાણી પરિવારના સભ્યો હતા. આ બધાં કલાકારોને શોમાંથી ઘણી લોકપ્રિયતા મળી. પ્રોમોમાં બધા કલાકારો શોમાં પાછા ફરવાથી ખૂબ ખુશ છે. બધા કલાકારોએ પોતાની પ્રતિક્રિયાઓ પણ શેર કરી છે.
શક્તિ આનંદ વીડિયોમાં કલાકારો સાથે ફરી જોડાવા અંગે પોતાનો ઉત્સાહ વ્યક્ત કરે છે અને યાદ કરે છે કે ‘ક્યોંકિ સાસ ભી કભી બહુ થી’ તેમનું ડેબ્યૂ થયું હતું. હિતેન તેજવાણી અને તેમની પત્ની ગૌરી પ્રધાને શોમાં પાછાં ફરવા પર અનુભવ શેર કર્યો હતો. તેમણે કહ્યું કે તેમને એવું લાગે છે કે જાણે આ સેટ ક્યારેય છોડ્યા જ નથી. કમલિકાએ એમ પણ કહ્યું કે 8 વર્ષ સુધી આ પાત્ર ભજવ્યા પછી જ્યારે તે 2025માં સેટ પર પાછી આવી ત્યારે તે તેમના માટે એક અનોખી ક્ષણ હતી.