રાજકોટ કલેક્ટર કચેરીના પાર્કિંગમાં બાઇકમાંથી પેટ્રોલ ચોરી કરતાં પકડાયેલા સિક્યુરીટીમેન (ગુજરાત ઇન્ડસ્ટ્રીઝ સિક્યુરીટી ફોર્સના જવાન) સામે હવે સસ્પેન્શનના પગલા તોળાઇ રહ્યા છે. કલેક્ટર કચેરીના વાહન પાર્કિંગમાં બાઇકમાંથી પેટ્રોલની ચોરી કરતાં આ સિક્યુરીટીમેન રંગે હાથ ઝડપાઇ જતાં આ મામલે જરૂરી આધાર-પુરાવા સાથે જિલ્લા કલેક્ટર સમક્ષ ફરિયાદ કરવામાં આવી હતી. જેમાં વીડિયો રેકોર્ડીંગના પુરાવા પણ રજૂ કરવામાં આવ્યા હતા. આ સમયે પેટ્રોલ ચોરીમાં ઝડપાયેલા આ સિક્યુરીટીમેને પોતાની પાસે પેટ્રોલના પૈસા ન હોવાનું અને તેનું વતન જસદણ હોવાથી તેના બાઇકમાં જસદણ જવા માટે કલેક્ટર કચેરીના કર્મચારીના બાઇકમાંથી ન છૂટકે પેટ્રોલની ચોરી કર્યાનું અને તેની ભૂલ થયાનું જણાવ્યું હતું. તેમજ હવે બીજી વખત આવું ન થાય તેમ કહી આ સિક્યુરીટીમેને માફી માગી લીધી હતી.
જે બાદ આ પેટ્રોલ ચોરીનો વીડિયો વાઇરલ થતાં હવે આ ગુજરાત ઇન્ડસ્ટ્રીયલ સિક્યુરીટી ફોર્સે કલેક્ટર કચેરીના સિક્યુરીટીમેન સામે સસ્પેન્શનના પગલા લેવા માટે તૈયારી કર્યાનું સુત્રોએ જણાવ્યું હતું.