ભારતની જીતની દુઆ પાકિસ્તાન ટીમને ફળી

ભારતે તેની પ્રથમ ક્રિકેટ મેચ અમેરિકા સામે 7 વિકેટે જીતી લીધી છે. આ સાથે ટીમ T-20 વર્લ્ડ કપના સુપર-8 રાઉન્ડમાં પહોંચી ગઈ છે. અમેરિકાની હાર સાથે પાકિસ્તાનની આગામી રાઉન્ડમાં પહોંચવાની આશા અકબંધ છે. જો કે, પાકિસ્તાને હજુ પણ છેલ્લી મેચ જીતવાની અને અમેરિકા આગામી મેચમાં આયર્લેન્ડ સામે હારી જાય તેની આશા રાખવી પડશે.

ટીમ ઈન્ડિયા સુપર-8માં પહોંચનારી ત્રીજી ટીમ બની છે. ગ્રુપ-Bમાંથી ઓસ્ટ્રેલિયા, ગ્રુપ-Dમાંથી દક્ષિણ આફ્રિકા અને ગ્રુપ-Cમાંથી વેસ્ટ ઈન્ડિઝ પણ આગલા રાઉન્ડમાં પહોંચી ગઈ છે.

મંગળવાર સુધી ગ્રુપ Aમાં ભારત અને અમેરિકાના 4-4 પોઈન્ટ હતા. બુધવારે ભારતે મેચ જીતીને 6 પોઈન્ટ મેળવીને સુપર-8માં જગ્યા બનાવી લીધી છે. અમેરિકાની છેલ્લી મેચ 14 જૂને આયર્લેન્ડ સામે થશે. જો અમેરિકા આમાં પણ હારી જશે તો ટીમ 4 પોઈન્ટ પર અટકી જશે અને તેનાથી પાકિસ્તાનને ફાયદો થશે.

પાકિસ્તાનના 2 હાર અને એક જીતથી માત્ર 2 પોઈન્ટ છે. ટીમની છેલ્લી મેચ 16 જૂને આયર્લેન્ડ સામે થશે. આ જીતવાથી પાકિસ્તાનના પણ અમેરિકાના બરાબર 4 પોઈન્ટ થઈ જશે. આ સ્થિતિમાં સારી રન રેટ ધરાવતી ટીમ સુપર-8માં પહોંચી જશે. પાકિસ્તાનનો મુકાબલો અમેરિકા પછી થશે, તેથી તેમને ખબર પડશે કે ક્વોલિફાય થવા માટે તેમને કેટલા માર્જિનથી જીતવાની જરૂર છે.