બોલિવૂડથી લઈને હોલિવૂડ સુધી પોતાની ઓળખ બનાવનાર ગ્લોબલ આઈકોન પ્રિયંકા ચોપરા ભલે વિદેશમાં વસે છે, પરંતુ તે પોતાના ભારતીય સંસ્કારો અને સંસ્કૃતિને ક્યારેય ભૂલી નથી. પ્રિયંકા અવારનવાર તેની દિકરી માલતી મેરી ચોપરા જોનાસને સનાતન ધર્મની પરંપરાઓ અને સંસ્કારો શીખવતી જોવા મળે છે. હાલમાં જ પ્રિયંકાએ એક ખૂબ જ સુંદર અને ક્યૂટ વીડિયો સોશિયલ મીડિયા પર શેર કર્યો છે, જેમાં તે માલતીને સંસ્કૃત મંત્રો શીખવતી નજરે પડે છે.
વીડિયો સાથે પ્રિયંકાએ લખ્યું કે તેની બે પર્સનાલિટી છે – ‘મામા’ અને ‘મામસીટા’. વીડિયોના પહેલા ભાગમાં તે માલતી સાથે સમય વિતાવતી જોવા મળી હતી, જ્યારે બીજા ભાગમાં તે વેસ્ટર્ન ડ્રેસમાં ડાન્સ કરતી જોવા મળી હતી.
પ્રિયંકા ચોપરાએ પોતાના ઈન્સ્ટાગ્રામ હેન્ડલ પર એક ક્યૂટ વીડિયો પોસ્ટ કર્યો છે. આ વીડિયોમાં પ્રિયંકા તેની નાની દીકરી માલતી મેરીને ‘દુર્ગા સપ્તશતી’ના મંત્રો શુદ્ધ ઉચ્ચારણ સાથે શીખવી રહી છે. વીડિયોમાં જોઈ શકાય છે કે પ્રિયંકા એક-એક શબ્દ બોલે છે અને નાની માલતી પણ ખૂબ જ મન લગાવીને તેની મમ્મીની પાછળ-પાછળ તે મંત્રોનું પુનરાવર્તન કરે છે. માલતીએ પોતાના કાલાઘેલા અવાજથી ફેન્સના દિલ જીતી લીધા છે.
પ્રિયંકા ચોપરાનો આ વીડિયો સામે આવતા જ સોશિયલ મીડિયા પર ઝડપથી વાઈરલ થઈ રહ્યો છે. ફેન્સ અને બોલિવૂડ સેલેબ્સ પ્રિયંકાના ખૂબ વખાણ કરી રહ્યા છે. લોકોનું કહેવું છે કે વિદેશમાં રહેવા છતાં પ્રિયંકા પોતાની દીકરીને ભારતીય મૂલ્યો, સંસ્કૃતિ અને સનાતન સંસ્કારો સાથે જોડી રહી છે, જે ખરેખર પ્રશંસાપાત્ર છે.