બોલિવૂડ એક્ટ્રેસ નિમરત કૌર તાજેતરમાં સોમનાથ મહાદેવ અને દ્વારિકાધીશના દર્શન કરવા ગુજરાત પહોંચી હતી. ‘ધ લંચબોક્સ’ ફેમ એક્ટ્રેસે આ ધાર્મિક યાત્રાના ફોટો શેર કર્યાં છે.
વાસ્તવમાં નિમરત કૌરે સોશિયલ મીડિયા પ્લેટફોર્મ ઇન્સ્ટાગ્રામ પર આજે કેટલાક ફોટો શેર કર્યાં છે. ફોટોના કેપ્શનમાં તેણે લખ્યું, ‘દૈવી આશીર્વાદ અને અનંત કૃતજ્ઞતા. હર હર મહાદેવ. શ્રી સોમનાથાય નમઃ, શ્રી નાગેશ્વરાય નમઃ, શ્રી દ્વારિકાધીશાય નમઃ, હર હર મહાદેવ, કૃષ્ણાર્પણમસ્તુ.’
નિમરત કૌરે ગુજરાતના પ્રવાસ દરમિયાન પ્રથમ જ્યોતિર્લિંગ શ્રી સોમનાથ મંદિરના દર્શન કર્યાં હતાં. આ દરમિયાન તેણે ઉનાળાને ધ્યાનમાં લઈને કેસરી રંગનો કોટનનો ડ્રેસ પહેર્યો હતો. સાથે જ તેણે ગોલ્ડન અને લીલા રંગની સિંપલ જ્વેલરી પહેરી હતી.
સોમનાથ ઉપરાંત તેણે નાગેશ્વર જ્યોતિર્લિંગના પણ દર્શન કર્યાં હતાં. આ દરમિયાન તેણે પિસ્તા અને મરૂન રંગનો કોટનનો ડ્રેસ પહેર્યો હતો. સાથે જ તેણે ચંદનથી ત્રિપુંડ પણ કરેલું હતું.