એપલના સીઈઓ ટિમ કૂકે અમેરિકામાં 100 બિલિયન ડોલર (લગભગ 8.7 લાખ કરોડ રૂપિયા)ના નવા રોકાણની જાહેરાત કરી છે. હવે અમેરિકામાં એપલનું કુલ રોકાણ વધીને 600 બિલિયન ડોલર (લગભગ 53 લાખ કરોડ રૂપિયા) થશે. ટિમ કૂકે અમેરિકાના રાષ્ટ્રપતિ ડોનાલ્ડ ટ્રમ્પને મળ્યા અને તેમને એક ગિફ્ટ પણ આપી.
આ ગિફ્ટ ગોરિલા ગ્લાસથી બનેલી એક મોટી ગોળ ડિસ્ક છે, જે iPhones માં વપરાતો કાચ છે. આ ડિસ્કની વચ્ચે Appleનો લોગો બનાવવામાં આવ્યો છે. આ ઉપરાંત, આ ગિફ્ટની ઉપર રાષ્ટ્રપતિ ટ્રમ્પનું નામ લખેલું છે અને “Made in USA – 2025” લખેલું છે. આ ડિસ્ક 24 કેરેટ સોનાથી બનેલા સ્ટેન્ડ પર લગાવેલી છે.
એપલ ચીનને બદલે ભારતમાં આઇફોન પ્રોડક્શન પર ધ્યાન કેન્દ્રિત કરી રહ્યું છે. અમેરિકામાં વેચાતા 78% આઇફોન ભારતમાં બનાવવામાં આવે છે. માર્કેટ રિસર્ચર કેનાલિસના મતે, 2025માં જાન્યુઆરીથી જૂન દરમિયાન ભારતમાં 23.9 મિલિયન (2 કરોડ 39 લાખ) આઇફોન બનાવવામાં આવ્યા હતા, જે ગયા વર્ષ કરતા 53% વધુ છે.
રિસર્ચ ફર્મ સાયબર મીડિયા રિસર્ચ મુજબ, ભારતમાંથી આઇફોન નિકાસ (ભારતથી વિદેશમાં મોકલવામાં આવતા આઇફોન) પણ વધીને 22.88 મિલિયન (2 કરોડ 28 લાખ) યુનિટ થઈ ગઈ છે. ગયા વર્ષના સમાન સમયગાળામાં (જાન્યુઆરીથી જૂન) ભારતમાં આઇફોન મેન્યુફેક્ચરિંગનો આંકડો 15.05 મિલિયન (1 કરોડ 50 લાખ) હતો. એટલે કે, વાર્ષિક ધોરણે તેમાં 52%નો વધારો થયો છે.
કારોબારની વાત કરીએ તો, 2025ના પહેલા 6 મહિનામાં ભારતમાંથી લગભગ 1.94 લાખ કરોડ રૂપિયાના આઇફોનની નિકાસ કરવામાં આવી હતી. ગયા વર્ષે આ આંકડો 1.26 લાખ કરોડ રૂપિયા હતો.