શનિવાર એટલે કે 24 ફેબ્રુઆરીએ મહા માસની પૂર્ણિમા છે. આ તિથિને પુરાણોમાં ઉત્સવ કહેવામાં આવે છે. આ દિવસે ગંગા સ્નાન કરવાની પરંપરા છે. જો તમે તેમ ન કરી શકો તો પાણીમાં ગંગાજળના થોડા ટીપા નાખીને ઘરે સ્નાન કરવાથી પુણ્ય પ્રાપ્ત થઈ શકે છે.
આ દિવસે જરૂરિયાતમંદ લોકોને દાન કરવાથી અને ભગવાન વિષ્ણુની પૂજા કરવાથી સૌભાગ્ય, સુખ અને સમૃદ્ધિ વધે છે. પુરાણોમાં જણાવ્યા અનુસાર, આ તહેવાર પર કરવામાં આવેલ શુભ કાર્યો અખૂટ પુણ્ય લાવે છે.
એવું માનવામાં આવે છે કે મહા મહિનામાં દેવતાઓ પૃથ્વી પર માનવ સ્વરૂપ ધારણ કરે છે અને પ્રયાગમાં સ્નાન, દાન અને જપ કરે છે. આ જ કારણ છે કે આ દિવસે પ્રયાગમાં ગંગામાં સ્નાન કરવાથી વ્યક્તિની મનોકામના પૂર્ણ થાય છે અને મોક્ષ મળે છે.
આ પૂર્ણિમાના દિવસે સ્નાન, દાન, હવન, વ્રત અને જપ કરવામાં આવે છે. આ દિવસે સૂર્યોદય પહેલાં જાગીને પવિત્ર નદીમાં સ્નાન કરો. જો તમે આ કરી શકતા નથી, તો સ્નાનના પાણીમાં ગંગા અને યમુના જેવી પવિત્ર નદીઓનું પાણી ભેળવીને ઘરે સ્નાન કરો.
સ્નાન કર્યા પછી, ઓમ સૂર્યાય નમ: ઓમ આદિત્યાય નમઃ મંત્રનો જાપ કરતી વખતે સૂર્યને અર્ઘ્ય ચઢાવો. આ દિવસે પૂજા અને ઉપવાસની સાથે પિતૃઓનું શ્રાદ્ધ કરવું. આ વ્રત દરમિયાન ખાસ કરીને તલનું દાન કરવામાં આવે છે.
પુરાણો શું કહે છે?
બ્રહ્મવૈવર્ત પુરાણ કહે છે કે ભગવાન વિષ્ણુ આ તહેવાર પર પાણીમાં નિવાસ કરે છે. તેથી, આ દિવસે તીર્થયાત્રા પર અથવા કોઈપણ નદીમાં પવિત્ર સ્નાન કરવાથી પુણ્ય પ્રાપ્ત થાય છે. આ દિવસે ભગવાન વિષ્ણુની પૂજા કરવાથી જીવનની તમામ ખામીઓ દૂર થાય છે અને વ્યક્તિને સ્વસ્થ જીવનનું સૌભાગ્ય મળે છે.