રાજકોટ શહેરમાં હાલ સૌથી મોટી સમસ્યા ટ્રાફિક અને પાર્કિંગને લઈને છે. શહેરમાં ક્યાંય પણ પાર્કિંગ માટે કાર તો ઠીક બાઈક માટે પણ મુખ્ય બજારોમાં જગ્યા મળતી નથી. મહિલાઓ ખરીદી કરવા માટે જાય એટલે દૂર દૂર વાહનો મુકવા પડે છે અને ત્યાં પણ નો પાર્કિંગ ઝોન હોય તો આકરો દંડ થાય છે. રાજકોટ શહેર પોલીસે એક જ વર્ષમાં નો પાર્કિંગ ઝોન અને રસ્તા પર પાર્કિંગ કરવા બદલ 27473 વાહનોને દંડ કર્યો છે અને જેની વસૂલાત 2,08,51,000 રૂપિયા થાય છે. આ એ જ શહેરીજનોના ખિસ્સામાંથી જાય છે જે મનપાને વાહન વેરો ભરે છે.
રાજકોટ શહેરમાં તો પાર્કિંગ માટે જગ્યા નથી પણ મનપાના બજેટમાં પણ પાર્કિંગની જગ્યા થઈ નથી. શહેરની આ સમસ્યા માટે મનપાના કોઈ ખુલ્લા પ્લોટમાં પાર્કિંગ બનાવવું, રોડ પરના દબાણ દૂર કરવા, ફૂટપાથના દબાણ દૂર કરવા, નવી પાર્કિંગ પોલીસી બનાવવી, પાર્કિંગની જગ્યા તરીકે બિલ્ડિંગ પ્લાનમાં બાદ કરેલી જગ્યાઓ પર ખડકાયેલા દબાણ દૂર કરવા, નવેસરથી પાર્કિંગ ખુલ્લા કરવા વન ડે વન વોર્ડ ઝુંબેશ શરૂ કરવી. આ કોઇ વસ્તુની અસર બજેટમાં દેખાઇ નથી. હવે પદાધિકારીઓ શહેરનીપાર્કિંગની સમસ્યા માટે કોઇ નવો અને પૂરો થાય તેવો પ્રોજેક્ટ લઈ આવે તો જોવાનુ રહ્યું.