રાજકોટ જિલ્લાના ઉપલેટાની એચ.ડી.એફ.સી.બેંકમાં ખોટા બિલો અને ડોક્યુમેન્ટ રજૂ કરી રૂપિયા 64 લાખ ઉપરાંતની રકમની લોન નવ પશુપાલકે મેળવી હતી. આ લોન ભરપાઈ ન કરવા તેમજ શરતોનું પાલન નહીં કરતા HDFC બેંકના રિજનલ મેનેજરે ઢાંક ગામના 9 વ્યક્તિ સામે છેતરપિંડી સહિતની કલમ હેઠળ પોલીસ ફરિયાદ નોંધાવી છે.
HDFC બેંકના રિજનલ મેનેજર કેતનભાઈ જગદીશચંદ્ર દવે દ્વારા પોલીસ ફરિયાદમાં જણાવ્યા પ્રમાણે, જેમની સામે ગુનો દાખલ કરવામાં આવ્યો છે તે વ્યક્તિઓ એચ.ડી.એફ.સી. બેંકની ઉપલેટાની શાખામાં પશુ ખરીદવા માટે તેમજ પશુ સંબંધિત લોન મેળવવા માટેની અરજીઓ કરી અને લોન મેળવી હતી. એ વખતે દૂધની આવક અંગેના દાખલાઓ તેમજ અલગ-અલગ દૂધની ડેરીઓ ખાતેથી બનાવટી ડોક્યુમેન્ટ મેળવી અને ખોટી માહિતીઓ આપી હતી. બનાવટી ડોક્યુમેન્ટને ખરા તરીકે ઉપયોગ કરી બેંકમાંથી લોન મેળવી બેંકને લોનની રકમ મેળવી લીધા બાદ બેંકને નાણાની ચૂકવણી નહીં કરતા એગ્રીમેન્ટની શરતોનો ભંગ કર્યો છે. તેમજ આ શરતોનું પાલન નહીં કરવા ઉપરાંત બેંક દ્વારા આપવામાં આવેલી કુલ રૂપિયા 64,66,499ના નાણાની રકમ નહીં ચૂકવતા બેંક સાથે છેતરપિંડી કરી છે. આ મામલામાં બેંક દ્વારા ભાયાવદર પોલીસ મથકમાં પોલીસ ફરિયાદ નોંધાવવામાં આવી છે.