દેશની મોટી પ્રાઈવેટ બેંકો અને ટેલિકોમ કંપનીઓ ‘સાયલન્ટ ઓથેન્ટિકેશન’ ટેકનિક પર કામ કરી રહી છે. આનાથી ઓનલાઈન પેમેન્ટ કરવા પર વન-ટાઈમ પાસવર્ડ (OTP)ની જરૂરિયાત ખતમ થઈ જશે. આ સિસ્ટમ બેકગ્રાઉન્ડમાં જ ચેક કરી લેશે કે બેંક એપમાં રજિસ્ટર્ડ નંબર અને ફોનનું સિમ કાર્ડ મેચ થઈ રહ્યા છે કે નહીં.
જો સિમ અને નંબર મેચ નહીં થાય, તો ટ્રાન્ઝેક્શન તરત જ બ્લોક થઈ જશે. ખાસ વાત એ છે કે આમાં યુઝરને કંઈ પણ કરવાની જરૂર નહીં પડે. આ ટેકનિક ઈ-સિમ (eSIM) પર પણ કામ કરશે. આનાથી સિમ ક્લોનિંગ અને ઈ-સિમ સ્વેપ જેવા ફ્રોડ અટકશે. આ જાણકારી એક્સિસ બેંકના ડિજિટલ બિઝનેસ હેડ સમીર શેટ્ટીએ આપી.
ઓનલાઈન ફ્રોડ રોકવામાં મદદ મળશે
શેટ્ટીએ જણાવ્યું, ‘અમે ટેલિકોમ કંપનીઓ સાથે મળીને સાયલન્ટ ઓથેન્ટિકેશનના ઘણા પાયલટ પ્રોજેક્ટ્સ પર કામ કરી રહ્યા છીએ. જો કોઈ વ્યક્તિ એપમાં લોગ-ઈન હોય, પરંતુ તેનો મોબાઈલ નંબર રજિસ્ટર્ડ નંબર સાથે મેચ ન થાય, તો ટેલિકોમ નેટવર્ક અમને તેનો સિગ્નલ આપશે. આનાથી અમે ગ્રાહકને પરેશાન કર્યા વિના સંભવિત ફ્રોડ શોધી શકીશું.’