શહેરમાં કાલાવડ રોડ પર વડવાજડી ગામ પાસે શ્રી હરસિદ્ધિ હોટેલવાળી વિવાદિત જગ્યા પર ચેક કરવા જતા મેટોડા પોલીસ મથકના પીએસઆઇ સહિતની ટીમ પર હોટેલ સંચાલકે હુમલો કર્યો હતો અને તેના ભાઇએ ફોન કરી ગાળો આપતા પોલીસે સંચાલકની અટકાયત કરી જીપમાં બેસાડી દેતા શખ્સે સરકારી જીપના કાચ તોડી નાસી જવાનો પ્રયાસ કરતાં પોલીસે ફરજમાં રુકાવટ સહિતનો બે ભાઇઓ સામે ગુનો નોંધી કાર્યવાહી કરી છે.
પોલીસ સૂત્રોના જણાવ્યા મુજબ મેટોડા જીઆઇડીસી પોલીસ મથકના પીએસઆઇ એન.વી. ઝાલા સહિતના સ્ટાફે નાઇટ કોમ્બિંગમાં ફરજ પર હતા ત્યારે સરકારી જીપ લઇ પેટ્રોલિંગ કરતી વેળાએ કાલાવડ રોડ પર વડવાજડી ગામ પાસે શ્રી હરસિદ્ધિ હોટેલ પાસે માણસોની ભીડ હોય અને હોટેલ મોડી રાત સુધી ખુલ્લી હોય જેથી ત્યાં જઇને પીએસઆઇ સહિતના સ્ટાફે લોકોને ઘેર જવા માટે કહ્યું હતું. દરમિયાન હોટેલ સંચાલક બળવંતસિંહ પ્રતાપસિંહ પરમારએ ઉશ્કેરાઇ જઇ બોલાચાલી કરી હતી અને તેના ભાઇ પ્રદીપસિંહને ફોન કરી સ્પીકર પર ફોન રાખ્યો હોય અને તે પણ પોલીસને ગાળાગાળી કરી હતી. દરમિયાન બળવંતસિંહએ પોલીસ સાથે ઝપાઝપી કરવા લાગતા જેથી પીએસઆઇ સહિતે કાયદો હાથમાં ન લેવા માટે સમજાવ્યા હતા.
દરમિયાન પીએસઆઇ ઝાલાએ હોટેલ સંચાલક બળવંતસિંહ પરમારની અટકાયત કરી તેને જીપમાં બેસાડી પોલીસ મથકે લાવતા હતા તે દરમિયાન સંચાલકે જીપના કાચ તોડી નાસી જવાનો પ્રયાસ કરતાં પોલીસે તેને ઝડપી લઇ કાયદાનો પાઠ ભણાવ્યો હતો તેમજ પીએસઆઇની ફરિયાદ પરથી બળવંતસિંહ અને પ્રદીપસિંહ પરમાર સામે ફરજમાં રુકાવટની ફરીયાદ પરથી પીઆઇ શર્મા સહિતના સ્ટાફે ગુનો નોંધી બળવંતસિંહની ધરપકડ કરી વધુ એક આરોપી પ્રદીપસિંહને પકડી લેવા કાર્યવાહી કરી છે.