ફેબ્રુઆરીના પહેલા અઠવાડિયામાં વિદેશી પોર્ટફોલિયો રોકાણકારો (FPI) ભારતીય શેરબજારમાં નેટ ખરીદદાર બન્યા છે. તેમણે એક અઠવાડિયામાં ₹8,100 કરોડથી વધુનું રોકાણ કર્યું છે.
આ ખરીદી ઇન્ડિયા-યુએસ ટ્રેડ ડીલને કારણે થઈ છે, જેનાથી બજારમાં સકારાત્મક સેન્ટિમેન્ટ આવ્યું છે. છેલ્લા ત્રણ મહિનાથી FPI સતત વેચવાલી કરી રહ્યા હતા, પરંતુ હવે ટ્રેન્ડ બદલાઈ ગયો છે.
FPI એ ફેબ્રુઆરીમાં અત્યાર સુધી ₹8,129 કરોડની ખરીદી કરી
NSDLના ડેટા અનુસાર, ફેબ્રુઆરીના પહેલા 6 દિવસ સુધી FPIએ ભારતીય ઇક્વિટીમાં ₹8,129 કરોડનું રોકાણ કર્યું. આ આંકડો 6 ફેબ્રુઆરી સુધીનો છે. આ પહેલા જાન્યુઆરીમાં FPIએ ₹35,962 કરોડ પાછા ખેંચ્યા હતા.
ડિસેમ્બરમાં ₹22,611 કરોડ અને નવેમ્બરમાં ₹3,765 કરોડની વેચવાલી કરી હતી. 2025ના આખા વર્ષમાં FPIએ નેટ 1.71 લાખ કરોડ રૂપિયા પાછા ખેંચ્યા હતા, જે ઘણા લાંબા સમયનો સૌથી ખરાબ સમયગાળો હતો.
US ટ્રેડ ડીલે માહોલ બદલ્યો
ભારત અને યુએસ વચ્ચે વેપાર સોદા પર સફળતા મળવાથી વૈશ્વિક અનિશ્ચિતતા ઓછી થઈ છે. યુએસએ ભારતીય માલસામાન પર ટેરિફ ઘટાડવાની વાત કરી છે, જેનાથી બજારમાં જોખમ લેવાની વૃત્તિમાં સુધારો થયો છે.
રૂપિયામાં પણ સુધારો આવ્યો છે, જે અગાઉ રેકોર્ડ નીચા સ્તરે 90.30 પર પહોંચ્યો હતો, પરંતુ હવે સ્થિર થઈ રહ્યો છે. નિષ્ણાતોનું કહેવું છે કે આ સોદો વૈશ્વિક વેપાર તણાવ ઘટાડવામાં મદદરૂપ સાબિત થશે.