શાહરુખ ખાનની પત્ની ગૌરી ખાનની મુંબઈમાં એક આલીશાન રેસ્ટોરાં છે. ખૂબ જ મોંઘેરી આ રેસ્ટોરાંમાંથી નકલી પનીર મળ્યું હોવાનો એક યુટ્યૂબરે દાવો કર્યો છે. સાર્થક સચદેવા નામના સોશિયલ મીડિયા ઇન્ફ્લુએન્સરે સેલેબ્સની મોંઘી રેસ્ટોરાંમાં જઈને પનીર ટેસ્ટિંગ કરતો વીડિયો શેર કર્યો, જેમાં તે વિરાટ કોહલી, શિલ્પા શેટ્ટી અને ગૌરી ખાનની રેસ્ટોરન્ટમાં જાય છે અને ત્યાં પીરસવામાં આવતા પનીરનો ટેસ્ટ કરે છે. તેણે જ્યારે ગૌરીની રેસ્ટોરાં ‘ટોરી’માં ટેસ્ટ કર્યું તો પરિણામે બધાને ચોંકાવી દીધા હતા. જોકે રેસ્ટોરાંની ટીમે તમામ દાવાઓને ફગાવી દીધા છે.
યુટ્યૂબરે વીડિયો શેર કરી રેસ્ટોરાંની પોલ ખોલી યૂટ્યૂબર સાર્થક સચદેવાએ મુંબઈનાં ઘણાં સેલેબ્સ રેસ્ટોરાંની મુલાકાત લીધી હતી. સાર્થક વિરાટ કોહલીની વન 8 કોમ્યુન, શિલ્પા શેટ્ટીની બેસ્ટિયન, બોબી દેઓલની સમ પ્લેસ એલ્સમાં આયોડિનની મદદથી પનીર ટેસ્ટ કરે છે. વીડિયોમાં જોવા મળે છે કે પહેલાં યુટ્યૂબર પનીર આધારિત વસ્તુઓ ઓર્ડર કરે છે, પછી એના ટુકડાને પાણીના બાઉલમાં ધોઈ નાખે છે. આ પછી એની પર આયોડિન ડ્રોપ નાખી ટેસ્ટ કરે છે. વિરાટ કોહલી, શિલ્પા શેટ્ટી અને બોબી દેઓલની રેસ્ટોરાં આ ટેસ્ટમાં પાસ થઈ જાય છે, જ્યારે યુટ્યુબરના દાવા અનુસાર ગૌરી ખાનની રેસ્ટોરાં પનીર ટેસ્ટમાં ફેલ થઈ જાય છે.
યૂટ્યૂબર સાર્થકનો વીડિયો વાઈરલ થતાં જ ટોરી રેસ્ટોરન્ટ તરફથી પ્રતિક્રિયા સામે આવે છે. તે જવાબ આપતાં સ્પષ્ટતા કરે છે કે આયોડિન ટેસ્ટ પનીરની અધિકૃતતા નહીં, પણ સ્ટાર્ચની હાજરી બતાવે છે. વાનગીમાં સોયા-આધારિત ઘટકો હોવાથી આ ટેસ્ટમાં આ પ્રકારનું રિએક્શન આવવું અપેક્ષિત છે. અમે અમારા પનીરની શુદ્ધતા અને ટોરીની દરેક વસ્તુમાં ક્વોલિટી આપીએ છીએ. સામે તરત જ સાર્થકે મજાકમાં કહ્યું- તો શું હવે મને રેસ્ટોરાંમાંથી બેન કરવામાં આવ્યો છે? બાય ધ વે, તમારું ભોજન અદ્ભુત છે. આ વીડિયો પર યુઝર્સ સતત કોમેન્ટ કરી રહ્યા છે.