નડિયાદના બિલોદરા ગામેથી ઉજાગર થયેલા નશાકારક સિરપકાંડ હજી સમેટાયો નથી. ત્યા હવે નશાકારક કેમીકલ પાવડર બનાવતી ફેક્ટરી ઝડપાઈ છે. નડિયાદ સ્થિત GIDCમાં ચાલતા આ ગેરકાયદે ધમધમતા વેપલાનો પર્દાફાશ સ્પેશિયલ ઓપરેશન ગ્રુપ (SOG) પોલીસે કર્યો છે. આ યુનિટમાં ક્લોરલમાંથી પ્રક્રિયા કરી ક્લોરલ હાઇડ્રેટ પાવડર બનાવાતો હોવાનું બહાર આવ્યું છે અને તેના રોઝ ક્રિસ્ટલના નામથી ખોટા બીલો બનાવી આ કેમિકલ પાવડર ઝેરી હોવાનું તેમજ નશા કરવા માટે ડુપ્લીકેટ તાડી બનાવવા માટે થતો હોવાનું બહાર આવ્યું છે. આથી પોલીસે આ યુનિટના સંચાલક સામે ગુનો નોંધી કાયદેસરની કાર્યવાહી હાથ ધરી છે. આ બનાવ બાદ નડિયાદ નશાકારક પદાર્થોનું ઉત્પાદન માટે જાણે ગુજરાતભરમાં જાણીતું બન્યું હોય તેમ લાગી રહ્યું છે.
આ કેમિકલ ખૂબ જ ઝેરી હોવાનું સામે આવ્યું
નડિયાદના સ્પેશ્યલ ઓપરેશન ગ્રુપ પોલીસના સ્ટાફને ગુપ્ત રાહે બાતમી મળી હતી કે, નડિયાદમાં કમળા રોડ ઉપર આવેલી જીઆઇડીસીમાં સી-3/10માં રુદ્ર એન્ટરપ્રાઇઝ નામની ફેક્ટરી ચાલે છે, જેમાં કોઈપણ જાતના પરવાના વગર ક્લોરલમાંથી પ્રક્રિયા કરી ક્લોરલ હાઇડ્રેટ પાવડર બનાવી તે અન્ય કેમિકલના નામે ગેરકાયદેસર રીતે ઉત્પાદન કરે છે. આ કેમિકલ ખૂબ જ ઝેરી હોવાનું તેમજ નશો કરવા માટે ડુપ્લીકેટ તાડી બનાવવા માટે થતો હોય છે જેથી પોલીસે ગત રોજ સમી સાંજે બાતમીના આધારે ઉપરોક્ત જગ્યાએ પહોંચી દરોડો પાડ્યો હતો.