રાજસ્થાનમાં સર્જાયેલું દક્ષિણ પૂર્વીય સર્ક્યુલેશન રાજ્યમાં વાદળછાયા વાતાવરણ અને માવઠાનું કારણ

રાજ્યમાં આગામી 5 દિવસ હવામાન વિભાગે હળવા વરસાદ અને વાદળછાયા વાતાવરણની આગાહી કરી છે. હવામાન વિભાગની આગાહી મુજબ આજે અને આવતીકાલે ઉત્તર પૂર્વીય અને દક્ષિણ ગુજરાતના કેટલાક વિસ્તારોમાં હળવો વરસાદ વરસી શકે છે તથા ગુજરાતમાં વાદળછાયું વાતાવરણ રહી શકે છે. ત્યારપછી બે દિવસ બાદ સમગ્ર રાજ્યમાં સૂકું વાતાવરણ રહેવાની હવામાન વિભાગે સંભાવના વ્યક્ત કરી છે.

હળવા વરસાદની આગાહી
હળવા વરસાદની સંભાવના ધરાવતા જિલ્લાઓમાં ખાસ કરીને ઉત્તર પૂર્વીય ગુજરાતના જિલ્લાઓ જેવા કે દાહોદ, મહીસાગર, અરવલ્લી, પંચમહાલ અને સાબરકાંઠા જિલ્લામાં ક્યાંક હળવો વરસાદ થઇ શકે છે. તો આવતીકાલે 5 ડિસેમ્બરના રોજ દક્ષિણ ગુજરાતના ભાગોમાં ક્યાંક હળવો વરસાદ વરસી શકે છે. જેમાં સુરત, તાપી, નર્મદા અને ભરૂચ જિલ્લામાં છૂટોછવાયો માવઠારૂપી વરસાદ વરસી શકે છે.

ઉલ્લેખનીય છે કે હાલમાં બંગાળની ખાડીમાં સર્જાયેલું મિચાંગ વાવાઝોડું ભારતના પૂર્વીય તટ પર ખતરો બનીને ત્રાટકી શકે છે. જેની ગુજરાત પરની અસરમાં જણાવીએ તો મિચાંગ વાવાઝોડાને કારણે ગુજરાત પર આવતા પવનોની દિશા બદલાઈ છે. બંગાળની ખાડી તરફથી પવનો આવવાની શરૂઆત થઈ છે. આ ઉપરાંત દક્ષિણ પૂર્વીય રાજસ્થાનના ભાગો પર સર્જાયેલા સર્ક્યુલેશનના કારણે ગુજરાતમાં વાદળછાયું વાતાવરણ રહેવાની સંભાવના છે અને કેટલાક ભાગોમાં હળવા વરસાદની પણ સંભાવના છે.

Leave a Reply

Your email address will not be published. Required fields are marked *