બોલિવૂડ એક્ટર રાજપાલ યાદવની મુશ્કેલીઓ ફરી એકવાર વધી ગઈ છે. 25 લાખ રૂપિયાના ચેક બાઉન્સ કેસમાં મધ્યપ્રદેશની મહૂની અદાલતે તેના વિરુદ્ધ બિનજામીનપાત્ર ધરપકડ વૉરંટ જારી કર્યું છે.
રાજપાલ યાદવ અનેક વખત સુનાવણી દરમિયાન કોર્ટમાં હાજર રહ્યો ન હતો. આ પહેલાં પણ તેના વિરુદ્ધ જામીનપાત્ર વૉરંટ જારી કરવામાં આવ્યું હતું, પરંતુ તેમ છતાં તે કોર્ટમાં હાજર થયો ન હતો.
ત્યારબાદ કોર્ટે મુંબઈ પોલીસને એક્ટર વિરુદ્ધ વૉરંટ જારી કરીને તેની ધરપકડ કરવાનો નિર્દેશ આપ્યો છે. સાથે જ આગામી સુનાવણી પહેલાં તેને મહૂ કોર્ટમાં રજૂ કરવાનો આદેશ આપ્યો છે.
આ મામલો મહૂ નિવાસી ફિલ્મ ફાઇનાન્સર પ્રકાશ જાજુની ફરિયાદ સાથે સંબંધિત છે. ફરિયાદ મુજબ, રાજપાલ યાદવ અને પ્રકાશ જાજુ વચ્ચે 25 લાખ રૂપિયાનો નાણાકીય વ્યવહાર થયો હતો. આ રકમ પરત કરવા માટે રાજપાલ યાદવ તરફથી ભવિષ્યની તારીખના ચેક આપવામાં આવ્યા હતા, જે બાઉન્સ થઈ ગયા.
બેંકમાં જમા કરાવતાં જ ચેક બાઉન્સ થઈ ગયા
પ્રકાશ જાજુએ જ્યારે આ ચેક બેંકમાં જમા કરાવ્યા, ત્યારે ખાતામાં પૂરતા પૈસા ન હોવાને કારણે ચેક બાઉન્સ થઈ ગયા. ત્યારબાદ તેમણે કોર્ટમાં ફરિયાદ નોંધાવી.
આ મામલો ચેક બાઉન્સ સાથે સંબંધિત છે, જેમાં પરક્રામ્ય લખત અધિનિયમ, 1881 (The Negotiable Instruments Act, 1881)ની કલમ 138 હેઠળ કેસ નોંધવામાં આવ્યો છે.
પહેલા જામીનપાત્ર વોરંટ જારી થયું, છતાં હાજર ન થયો
આ મામલામાં કોર્ટે પહેલાં રાજપાલ યાદવ વિરુદ્ધ જામીનપાત્ર વોરંટ જારી કર્યું હતું. ફરિયાદી પક્ષ એટલે કે પ્રોસિક્યુશનના વકીલ રાધેશ્યામ અગ્રવાલના જણાવ્યા અનુસાર, ત્યારબાદ રાજપાલ યાદવ મુંબઈ પોલીસ સમક્ષ હાજર થયો હતો.
તેણે નક્કી કરેલી તારીખે કોર્ટમાં આવીને જામીન કરાવવાનો વિશ્વાસ આપ્યો હતો, પરંતુ નક્કી સમય વીતી ગયા બાદ પણ તેણે ન તો જામીન કરાવ્યા અને ન તો પોતે કોર્ટમાં હાજર થયો. સતત ગેરહાજર રહેવા પર કોર્ટે તેને ગંભીરતાથી લીધું.
આ પછી ફર્સ્ટ ક્લાસ જ્યુડિશિયલ મેજિસ્ટ્રેટ ફરહાન એમ. કુરૈશીની અદાલતે તેના વિરુદ્ધ ધરપકડ વોરંટ જારી કર્યું.