ભારતીય શેરબજારમાં ગયા અઠવાડિયે ઉતાર-ચઢાવ વચ્ચે દેશની ટોપ-10 સૌથી મૂલ્યવાન કંપનીઓમાંથી ચારના માર્કેટ કેપિટલાઇઝેશન એટલે કે માર્કેટ કેપમાં કુલ 92,995.48 કરોડ રૂપિયાનો વધારો નોંધાયો છે.
આ તેજીમાં પ્રાઇવેટ સેક્ટરના દિગ્ગજ HDFC બેંક અને ટેલિકોમ કંપની ભારતી એરટેલ સૌથી આગળ રહ્યા. બીજી તરફ, બાકીની છ કંપનીઓને બજારની સુસ્તીના કારણે નુકસાન ભોગવવું પડ્યું અને તેમના વેલ્યુએશનમાં સામૂહિક રીતે 49,294.13 કરોડ રૂપિયાનો ઘટાડો થયો.
ચાર અઠવાડિયાની તેજી પર લાગી બ્રેક
ગયા કારોબારી અઠવાડિયે ભારતીય બેન્ચમાર્ક ઇન્ડેક્સ નજીવા ઘટાડા સાથે બંધ થયા, જેના કારણે છેલ્લા ચાર અઠવાડિયાથી ચાલી આવતી સતત તેજીનો સિલસિલો તૂટી ગયો. આખા અઠવાડિયાના કારોબાર દરમિયાન સેન્સેક્સ 194.52 પોઈન્ટ અથવા 0.25% ઘટીને બંધ થયો. જ્યારે નિફ્ટી પણ 63.95 પોઈન્ટ અથવા 0.26% ની નબળાઈ સાથે લાલ નિશાનમાં બંધ થયો.
HDFC બેંક અને ભારતી એરટેલ સહિત 4 કંપનીઓને ફાયદો
ટોપ-10 કંપનીઓની યાદીમાં જે ચાર કંપનીઓએ પોતાના રોકાણકારોને ફાયદો પહોંચાડ્યો, તેમાં રિલાયન્સ ઇન્ડસ્ટ્રીઝ, HDFC બેંક, ભારતી એરટેલ અને લાઇફ ઇન્સ્યોરન્સ કોર્પોરેશન ઓફ ઇન્ડિયા (LIC) સામેલ છે. વેલ્યુએશનના મામલે HDFC બેંકને સૌથી વધુ ફાયદો થયો. બેંકનું માર્કેટ કેપ 35,808.09 કરોડ રૂપિયા વધીને 12,69,454.42 કરોડ રૂપિયા પર પહોંચી ગયું.
શુક્રવારે માર્કેટમાં તેજી રહી હતી
શુક્રવારે એટલે કે 10 જુલાઈના રોજ શેરબજારમાં વધારો રહ્યો હતો. સેન્સેક્સ 828 અંક (1.08%)ની તેજી સાથે 77,569 પર બંધ થયો હતો. નિફ્ટીમાં પણ 244 અંક (1.02%)ની તેજી રહી, તે 24,206 પર પહોંચી ગયો હતો.