અમેરિકા-ઈરાન યુદ્ધને કારણે ભારતીય રૂપિયા પર દબાણ સતત વધી રહ્યું છે. સોમવારે ડોલર સામે ભારતીય રૂપિયો ₹95.23ના સ્તરે બંધ થયો.
ફેબ્રુઆરીના અંતમાં શરૂ થયેલા આ યુદ્ધ પછી માત્ર ત્રણ મહિનામાં રૂપિયો લગભગ ₹5 તૂટી ગયો છે, જેનાથી તમારી રોજિંદા જીવન, ઘરેલું બજેટ અને રોકાણ પર સીધી અસર પડશે.
યુદ્ધના 3 મહિનામાં રૂપિયો રેકોર્ડ નીચલા સ્તરે પહોંચ્યો
રશિયા-યુક્રેન પછી હવે મિડલ ઈસ્ટમાં ચાલી રહેલા તણાવની સીધી અસર ભારતીય ચલણ પર દેખાઈ રહી છે. આ વર્ષે 28 ફેબ્રુઆરીએ જ્યારે અમેરિકા-ઈરાન યુદ્ધ શરૂ થયું હતું, ત્યારે રૂપિયો પ્રતિ ડોલર ₹91ની આસપાસ હતો.
ત્યારબાદ ક્રૂડ ઓઇલની વધતી કિંમતો, વિદેશી સંસ્થાકીય રોકાણકારો (FII) દ્વારા બજારમાંથી સતત પૈસા પાછા ખેંચવા અને અમેરિકી ડોલર મજબૂત થવાને કારણે રૂપિયામાં ઘટાડો થયો. આને કારણે 21 મેના રોજ રૂપિયો રેકોર્ડ નીચલા સ્તર ₹96 પ્રતિ ડોલર પર પહોંચી ગયો હતો.
પીએમ મોદીની અપીલ, વિદેશી મુદ્રા ભંડાર બચાવો
રૂપિયાની સ્થિતિ સુધારવા અને દેશના વિદેશી મુદ્રા ભંડાર (ફોરેક્સ રિઝર્વ)ને સુરક્ષિત રાખવા માટે વડાપ્રધાન નરેન્દ્ર મોદીએ તાજેતરમાં દેશવાસીઓને એક ખાસ અપીલ કરી છે.
પીએમ મોદીએ નાગરિકોને આગ્રહ કર્યો છે કે તેઓ આવનારા એક વર્ષ સુધી સોનાની ખરીદી ન કરે, વિદેશોમાં ફરવા જવાનું ટાળે અને પેટ્રોલ-ડીઝલ તથા ગેસના વપરાશમાં જેટલો બને તેટલો ઘટાડો કરે.